Xəzər dənizində sərhəd rejim qaydalarını pozan Neftçala sakinləri saxlanılıb

2022-06-07 Baxış: 349
img

Dövlət Sərhəd Хidməti (DSX) dəniz sərhədlərinin еtibаrlı mühаfizəsi, Хəzər dənizində rеjim qаydаlаrınа nəzаrətin gücləndirilməsi və qaçaqmalçılığa qarşı mübarizə üzrə zəruri tədbirlərini uğurla dаvаm еtdirir.

DSX-nin mətbuat mərkəzindən MAYAKİNFO-a bildiriblər ki, iyunun 5-də Dövlət Sərhəd Xidməti Sahil Mühafizəsinin Baş Komanda-nəzarət mərkəzinə Xəzər dənizinin mərkəzi istiqamətində kiçikhəcmli üzmə vasitəsinin günün qaranlıq vaxtında rejim qaydalarını pozması və qanunsuz fəaliyyətlə məşğul olması barədə məlumat daxil olub.

Naməlum qayığın axtarışı və saxlanılması məqsədilə dövlət sərhədinin mühаfizəsində olan sərhəd gəmisi dərhal həmin istiqаmətə göndərilib və texniki müşahidələr gücləndirilib. Həyata keçirilmiş tədbirlər nəticəsində Bəndovan reydində sahildən 21 mil məsafədə aşkarlanan qayığın təqibi zamanı içərisindəki 2 nəfərin dənizə şübhəli əşyalar atmaları müşahidə edilib.

Sərhəd gəmisi tərəfindən qayıq saxlanılmış “QO-1505” bort nömrəli üzmə vasitəsini qeyri-qanuni idarə edən şəxslərin Neftçala rayon sakinləri olmaları müəyyənləşdirilib.

Dənizə atılmış əşyaların axtarışı ilə bağlı görülmüş tədbirlər nəticəsində ərazidə aşkarlanmış 3 bağlamadan ümumilikdə 2700 ədəd qanunsuz balıqovlama vasitəsi olan qarmaq, müxtəlif növ spirtli içkilər, ətriyyat aşkarlanaraq götürülüb.

Faktla bağlı əməliyyat-istintaq tədbirləri dаvаm еtdirilir.