Biz dost ölkələrik, strateji tərəfdaşıq.

Azərbaycan Respublikasının Prezidenti cənab İlham Əliyevin Macarıstana işgüzar səfəri zamanı verdiyi bəyanat bir daha sübut etdi ki, ölkəmizin dost və tərəfdaş dairəsi genişlənməkdə davam edir. Budapeştdə keçirilən yüksək səviyyəli görüşlər zamanı səsləndirilən fikirlər, xüsusilə də enerji, sənaye, nəqliyyat və humanitar sahələrdə əməkdaşlığın dərinləşməsi ilə bağlı razılaşmalar, Azərbaycanla Macarıstan arasında strateji tərəfdaşlığın real məzmun kəsb etdiyini göstərir.

Prezident İlham Əliyevin mətbuat qarşısında vurğuladığı əsas məqamlardan biri də budur: Azərbaycan heç vaxt dostlarını çətin vəziyyətdə qoymur və verdiyi sözə daim sadiqdir. Bu, təkcə enerji sahəsində deyil, həm də bütün münasibətlərdə etibarlılığın, sabitliyin və qarşılıqlı hörmətin təcəssümüdür.

Macarıstanın Azərbaycanın ərazi bütövlüyünə göstərdiyi qətiyyətli dəstək, Qarabağ və Şərqi Zəngəzurda həyata keçirilən bərpa-quruculuq işlərinə maraq göstərməsi, ortaq dəyərlər və maraqlar üzərində qurulmuş əməkdaşlığımızın gələcəkdə daha da möhkəmlənəcəyinə işarədir.

Bu səfər təkcə iki ölkə liderlərinin görüşü deyil, həm də Avropa ilə Azərbaycan arasında körpü rolunu oynayan güclü bir siyasi mesaj idi. Bir daha şahid olduq ki, dünyada dəyişən geosiyasi reallıqlar fonunda Azərbaycan etibarlı tərəfdaş olaraq çıxış edir və milli maraqlarını diplomatik məharətlə müdafiə edir.

Bu səfər, bu çıxış – həm diplomatik uğur, həm də milli qürur mənbəyidir.

İsmayıl Salmanov,

YAP Hacıqabul rayon təşkilatının məsləhətçisi.