Milli dövlətçilik ənənələrinin yeni səhifəsi.

28 May – Azərbaycanın Müstəqillik Günü, tariximizin şanlı səhifələrindən biridir. 1918-ci ildə Azərbaycan Xalq Cümhuriyyətinin yaradılması ilə xalqımız öz milli dövlətçilik arzularına çatdı. Bu, Şərqdə ilk demokratik və hüquqi dövlətin yaranması idi və Azərbaycanın müstəqillik tarixində yeni bir səhifə açıldı.

Cümhuriyyət dövründə Azərbaycanın beynəlxalq arenada tanınması istiqamətində mühüm addımlar atıldı. Azərbaycan Xalq Cümhuriyyəti qısa müddət ərzində dünyanın aparıcı dövlətləri ilə diplomatik əlaqələr yaratdı və öz dövlət atributlarını – bayraq, gerb və himni təsis etdi.

“Müstəqilliyi qorumaq, saxlamaq o müstəqilliyi əldə etməkdən qat-qat çətin bir vəzifə idi.” – Ulu Öndər Heydər Əliyev. Ulu Öndərin bu fikri, müstəqilliyin nə qədər dəyərli və eyni zamanda həssas olduğunu göstərir. 1918-ci ildə əldə olunan müstəqillik yalnız 23 ay yaşasa da, Azərbaycan xalqının yaddaşında və milli şüurunda dərin iz buraxdı. 1991-ci ildə SSRİ-nin süqutu ilə Azərbaycan yenidən öz müstəqilliyini bərpa etdi. Bu, tariximizin yeni inkişaf mərhələsinin başlanğıcı oldu. İkinci dəfə əldə olunan müstəqillik, bu dəfə möhkəm əsaslara söykənərək qorundu və inkişaf etdirildi.

Ulu Öndər Heydər Əliyev: “Əsrin əvvəlində – 1918-ci ildə Azərbaycan xalqı öz müstəqilliyinə nail ola bildi…” Ümummilli Lider Heydər Əliyevin bu sözləri Xalq Cümhuriyyətinin tarixi roluna verilən yüksək qiymətin göstəricisidir. Cümhuriyyətin yaratdığı dövlət təsisatları, milli özünüdərk və müstəqillik ideyası 1991-ci il müstəqilliyinin əsas dayaqlarını təşkil etdi.

Ulu Öndər Heydər Əliyev: “28 May günü Azərbaycan xalqı üçün əziz gündür…” Bu əlamətdar tarix xalqımızın müstəqil dövlət qurmaq əzmini və milli birliyini təcəssüm etdirir. 28 May – xalqın istiqlal ruhunun rəmzi, azadlıq ideyasının təntənəsidir.

Azərbaycan Xalq Cümhuriyyəti İli

Azərbaycan Respublikasında 2018-ci ilin “Azərbaycan Xalq Cümhuriyyəti İli” elan edilməsi, dövlətimizin öz tarixini, dövlətçilik ənənələrini yüksək qiymətləndirməsinin və bu dəyərləri gələcək nəsillərə çatdırmaq niyyətinin bariz nümunəsidir.

Prezident İlham Əliyev: “İyirmi üç aydan sonra respublika süqut etdi…” Prezident İlham Əliyevin bu sözləri, müstəqilliyin nə qədər çətin və məsuliyyətli bir yol olduğunu vurğulayır. 1990-cı illərin əvvəllərində Ulu Öndərin təşəbbüsü ilə Azərbaycan Xalq Cümhuriyyətinin bayrağı yenidən rəsmi dövlət bayrağı kimi qəbul olundu və bu, milli dövlətçiliyin davamlılığının simvoluna çevrildi.

Prezident İlham Əliyev: “Müstəqilliyimizin qorunması, möhkəmlənməsi ən vacib məsələlərdən biridir…” Azərbaycan Xalq Cümhuriyyətinin varisi olan müasir Azərbaycan dövləti bu gün sabitlik, iqtisadi inkişaf və beynəlxalq nüfuz baxımından uğurlu bir yol keçir. Prezident İlham Əliyevin rəhbərliyi ilə Azərbaycan öz müstəqilliyini daha da möhkəmləndirərək, regionda və dünyada söz sahibi olan bir ölkəyə çevrilmişdir.

28 May – təkcə bir tarix deyil, bir xalqın öz müqəddəratını təyin etmə əzminin və milli qürurunun təntənəsidir. Bu gün, biz təkcə keçmişə hörmət etmir, həm də gələcəyə inamla baxırıq. Azərbaycanın dövlət müstəqilliyi əbədi və dönməzdir!

         Aytən İmanova,

  Hacıqabul rayon Heydər Əliyev Mərkəzinin direktoru,

           YAP Hacıqabul rayon təşkilatının fəalı.