XX əsrin sonlarında Cənubi Qafqaz regionunda baş verən siyasi hadisələr Azərbaycan üçün ağır nəticələr doğurdu. Ermənistanın əsassız ərazi iddiaları, onun xarici havadarlarının siyasi və hərbi dəstəyi ilə daha da gücləndi. Bu proses nəticəsində Azərbaycanın beynəlxalq səviyyədə tanınmış ərazilərinin 20 faizi işğal edildi.

Ermənilər öz güclərinə arxalanmadan, xarici dövlətlərin hərbi, maliyyə və informasiya dəstəyi ilə silahlandırıldı. Onlara müasir texnika, müxtəlif silah növləri, döyüş sursatları təqdim olundu. Bu silahlanma yalnız hərbi məqsədlərə deyil, həm də mülki əhalini hədəf alan etnik təmizləmə siyasətinin həyata keçirilməsinə xidmət etdi. Azərbaycanın Qarabağ bölgəsi və ətraf rayonlarında dinc kəndlər yerlə-yeksan edildi, minlərlə insan qətlə yetirildi, bir milyondan artıq soydaşımız isə qaçqın və məcburi köçkün vəziyyətinə düşdü.

Bütün bu faciələr beynəlxalq hüququn norma və prinsiplərinin kobud şəkildə pozulması idi. Ermənistanın havadarları isə insanlıq əleyhinə cinayətlərə göz yumaraq, işğalın uzun illər davam etməsinə şərait yaratdılar. Bu hadisələr sübut etdi ki, güclü havadarların arxasında dayanan bir dövlət regionda sülh və sabitliyi pozmağa qadirdir.

Lakin Azərbaycan xalqı və dövləti işğalla barışmadı. Tarixi ədalətin bərpa olunacağına inam daim canlı saxlanıldı. 2020-ci ildə 44 günlük Vətən müharibəsində Azərbaycan Ordusu düşməni darmadağın edərək işğal altında olan torpaqlarının böyük hissəsini azad etdi. Bu qələbə xalqın gücünə, dövlətin siyasi iradəsinə və beynəlxalq hüququn haqq səsinə əsaslanırdı.

Azərbaycan tarixinin bu acı, eyni zamanda şərəfli səhifəsi bizə bir daha göstərir ki, milli birlik, güclü dövlət və xalqın qətiyyəti xarici havadarların planlarını alt-üst edə bilər.

Bahadur İsmayılov,

YAP fəalı, Hacıqabul rayonu Meyniman Kənd tam orta ümumtəhsil məktəbin direktoru.