Prezident İlham Əliyevin 25 sentyabr 2025-ci ildə BMT Baş Assambleyasının 80-ci sessiyasında etdiyi çıxış Azərbaycan dövlətinin beynəlxalq müstəvidə artan rolunu və prinsipial mövqelərini bir daha nümayiş etdirdi. Dövlət başçısı nitqində həm regional, həm də qlobal əhəmiyyətli məsələlərə toxunaraq Azərbaycan həqiqətlərini dünya ictimaiyyətinə çatdırdı. Onun çıxışı bir tərəfdən ölkəmizin son illərdə qazandığı tarixi nailiyyətlərin, digər tərəfdən isə beynəlxalq ədalətin bərpası yolunda apardığı mübarizənin güclü ifadəsi idi.

Prezident İlham Əliyev çıxışının əvvəlində Azərbaycanın müstəqillikdən keçdiyi tarixi yola nəzər salaraq, dövlətimizin beynəlxalq münasibətlər sistemində tutduğu mövqeyin daha da möhkəmləndiyini vurğuladı: “Biz gənc dövlətik, lakin keçdiyimiz yol əsrlər boyu azadlıq uğrunda mübarizə aparmış bir xalqın iradəsini əks etdirir. Azərbaycan bu gün dünya birliyində öz sözünü deyən, öz maraqlarını qoruyan və beynəlxalq hüquqa sadiq bir ölkə kimi tanınır”.

Dövlət başçısı Azərbaycanın BMT çərçivəsində fəal iştirakını xüsusi qeyd etdi və beynəlxalq təşkilatın islahatlara ehtiyacını vurğuladı. Onun sözlərinə görə, “BMT-nin nüfuzunun qorunması üçün ədalət prinsipinə əsaslanan qərarların icrası zəruridir. Əks halda beynəlxalq hüququn aliliyinə inam sarsılır.” Bu fikirlər, əslində, uzun illər işğal altında qalmış Azərbaycan torpaqlarının taleyinə biganə qalan beynəlxalq qurumlara ünvanlanmış ciddi mesaj idi.

Prezident İlham Əliyev çıxışında 44 günlük Vətən müharibəsinə və onun nəticələrinə də toxundu. O bildirdi: “Azərbaycan beynəlxalq hüququn ona verdiyi hüququ öz gücü ilə təmin etdi. Biz BMT Təhlükəsizlik Şurasının qətnamələrinin icrasını 27 ildən sonra özümüz təmin etməli olduq.” Dövlət başçısı bu sözləri ilə Azərbaycanın ədalətli mövqeyini bir daha dünya ictimaiyyətinə xatırlatdı və göstərdi ki, beynəlxalq sistemin ədalətsizliyi qarşısında xalqların haqq uğrunda mübarizəsi sarsılmazdır.

Eyni zamanda, Prezident post-müharibə dövründə həyata keçirilən quruculuq və reinteqrasiya prosesindən danışaraq dedi: “Biz bölgədə sülhün və əməkdaşlığın tərəfdarıyıq. Lakin bu sülh yalnız qarşılıqlı hörmət və beynəlxalq hüququn prinsiplərinə əməl edilməklə mümkündür.” Bu sözlər Azərbaycanın gələcək inkişaf vizyonunu və regionda sabitliyin bərqərar olması istiqamətində göstərdiyi səyləri açıq şəkildə nümayiş etdirdi.

Çıxışda diqqətçəkən digər mühüm məqam Azərbaycanın enerji təhlükəsizliyinə verdiyi töhfələrlə bağlı idi. Prezident vurğuladı ki, Azərbaycan həm Avropanın enerji təhlükəsizliyinin, həm də regionda yaşıl enerjiyə keçidin öncül güclərindən biridir: “Biz təkcə enerji daşıyıcıları ixrac etmirik, həm də yeni reallıqlar əsasında təmiz enerji gündəliyini təşviq edirik.” Bu məqam bir daha Azərbaycanın qlobal miqyasda strateji tərəfdaş statusunu gücləndirdi.

Azərbaycan Prezidentinin çıxışı həm də beynəlxalq münasibətlərdə ikili standartların aradan qaldırılması çağırışı ilə yadda qaldı: “Ədalət universal dəyərdir və seçici yanaşma ilə ölçülməməlidir. Əgər bir ölkənin suverenliyi müdafiə olunursa, digərinin də eyni hüquqa malik olması şübhə doğurmamalıdır.” Bu fikirlər dünyada baş verən geosiyasi böhranlar fonunda universal dəyərlərə qayıdışın vacibliyini ön plana çəkdi.

Prezident İlham Əliyevin çıxışı sadəcə rəsmi bəyanat deyil, həm də güclü siyasi mesaj idi. Onun nitqi Azərbaycanın müasir beynəlxalq sistemdə nüfuzlu, söz sahibi dövlət olduğunu təsdiqlədi. Qətiyyət, ədalətə sədaqət və milli maraqlara əsaslanan bu çıxış həm tarixi yaddaşa, həm də gələcəyə ünvanlanmış strateji proqram xarakteri daşıdı.

Cənab Prezident İlham Əliyev bir daha göstərdi ki, Azərbaycan müstəqil siyasət yürüdən, ədaləti müdafiə edən və beynəlxalq əməkdaşlığa açıq bir ölkədir. Onun sözləri Azərbaycan xalqının sarsılmaz iradəsini ifadə etməklə yanaşı, dünya ictimaiyyətinə də ədalət, sülh və inkişaf çağırışı idi.

            Bəxtiyar Ələkbərov,

            YAP Hacıqabul rayon təşkilatının ərazi partiya təşkilat (ƏPT) sədri.