Avropa İttifaqı Şurasının Prezidenti Antonio Koştanın Azərbaycana səfəri və Bakıda keçirilən görüşlər Azərbaycan–Avropa İttifaqı münasibətlərinin inkişafında mühüm siyasi hadisə kimi diqqət çəkir. Səfər çərçivəsində Azərbaycan Respublikasının Prezidenti İlham Əliyev ilə Antonio Koşta arasında keçirilən görüş və birgə mətbuat bəyanatı tərəflər arasında əməkdaşlığın yeni mərhələyə daxil olduğunu bir daha nümayiş etdirdi. Verilən bəyanatlar göstərir ki, Bakı ilə Brüssel arasında siyasi dialoq, iqtisadi əməkdaşlıq və enerji tərəfdaşlığı dinamik şəkildə inkişaf edir və qarşılıqlı maraqlara əsaslanan strateji məzmun daşıyır.

Prezident İlham Əliyev birgə mətbuat bəyanatı zamanı Azərbaycan ilə Avropa İttifaqı arasında formalaşmış fəal dialoqu xüsusi vurğuladı. Dövlət başçısı qeyd etdi ki, son illərdə tərəflər arasında müxtəlif səviyyələrdə intensiv təmaslar müşahidə olunur və bu proses münasibətlərin yeni keyfiyyət mərhələsinə yüksəldiyini göstərir. Prezident İlham Əliyev bildirdi: “Bizim çox fəal dialoqumuz var. Avropa Komissiyasının üzvləri ötən il və bu il dəfələrlə bizə səfər ediblər. Beləliklə, biz müxtəlif səviyyələrdə tərəfdaşlığın fəal mərhələsindəyik.” Bu fikirlər Azərbaycan–Avropa İttifaqı əlaqələrinin artıq sabit və sistemli əməkdaşlıq müstəvisində inkişaf etdiyini təsdiqləyir.

Azərbaycanın həyata keçirdiyi praqmatik və balanslaşdırılmış xarici siyasət kursu ölkəmizin beynəlxalq tərəfdaşları ilə münasibətlərinin möhkəmlənməsinə mühüm töhfə verib. Avropa İttifaqı ilə əlaqələr də məhz qarşılıqlı hörmət və bərabər tərəfdaşlıq prinsiplərinə əsaslanır. Prezident İlham Əliyevin bəyanatında qeyd etdiyi kimi, iqtisadi əməkdaşlıq bu münasibətlərin mühüm istiqamətlərindən biridir. Dövlət başçısı diqqətə çatdırdı ki, Avropa İttifaqı Azərbaycan üçün aparıcı ticarət tərəfdaşlarından biridir: “Bu ilin yanvarında ticari dövriyyəmizin 50 faizi Avropa İttifaqı ilə bağlı olub… Avropa İttifaqı bizim üçün bir nömrəli ticari tərəfdaşdır.”

Bu göstərici Azərbaycanın Avropa iqtisadi məkanında mövqeyinin möhkəmləndiyini göstərməklə yanaşı, qarşılıqlı iqtisadi əməkdaşlığın genişlənməsi üçün böyük potensialın mövcud olduğunu da nümayiş etdirir. Eyni zamanda, Prezident İlham Əliyev vurğuladı ki, ticarət əlaqələri yalnız bir istiqamətli proses deyil və Azərbaycan da Avropa ölkələrində fəal şəkildə investisiya yatırır. Bu fakt ölkəmizin artıq regional səviyyədə mühüm iqtisadi tərəfdaş kimi çıxış etdiyini göstərir.

Avropa İttifaqı Şurasının Prezidenti Antonio Koşta da öz növbəsində Azərbaycanla əməkdaşlığın strateji əhəmiyyətini vurğulayaraq bildirdi ki, Azərbaycan Avropa İttifaqının əsas tərəfdaşlarından biridir və son dövrlərdə münasibətlərdə yeni dinamika müşahidə olunur. Onun sözlərinə görə, tərəflər təhlükəsizlik, enerji, rəqəmsal və nəqliyyat sahələrində əməkdaşlığı daha da inkişaf etdirmək niyyətindədirlər. Bu yanaşma Avropa İttifaqının Azərbaycanla münasibətlərə böyük önəm verdiyini göstərir.

Qlobal geosiyasi proseslərin sürətlə dəyişdiyi bir dövrdə Azərbaycan ilə Avropa İttifaqı arasında əməkdaşlığın gücləndirilməsi xüsusi əhəmiyyət kəsb edir. Azərbaycanın əlverişli geosiyasi mövqeyi, zəngin enerji resursları və inkişaf edən nəqliyyat infrastrukturu Avropa ilə əməkdaşlıq üçün mühüm imkanlar yaradır. Bu baxımdan Bakıda keçirilən görüş və səsləndirilən fikirlər tərəflər arasında əməkdaşlığın gələcəkdə daha da genişlənəcəyinə dair ciddi siyasi iradənin mövcud olduğunu göstərir.

Beləliklə, Avropa İttifaqı Şurasının Prezidenti Antonio Koştanın Azərbaycana səfəri və səsləndirilən bəyanatlar Azərbaycan–Avropa İttifaqı münasibətlərinin inkişafında yeni mərhələnin başlanğıcını ifadə edir. Prezident İlham Əliyevin rəhbərliyi ilə həyata keçirilən xarici siyasət kursu Azərbaycanın beynəlxalq mövqelərini daha da gücləndirir və ölkəmizin Avropa ilə əməkdaşlığını strateji tərəfdaşlıq səviyyəsinə yüksəldir. Bu əməkdaşlıq isə yalnız siyasi dialoqu deyil, həm də iqtisadi inkişafı, regional sabitliyi və qarşılıqlı tərəqqini təşviq edən mühüm amil kimi çıxış edir.

Şəfəq Balaşova,

YAP Neftçala rayon təşkilatı ərazi partiya təşkilatının sədri

Neftçala şəhər 4 nömrəli tam orta məktəbin direktoru