Avropa İttifaqı Şurasının Prezidenti Antonio Koştanın Azərbaycana səfəri və Bakıda keçirilən birgə mətbuat bəyanatı Azərbaycan–Avropa İttifaqı əməkdaşlığının enerji sahəsində strateji əhəmiyyətini bir daha nümayiş etdirdi. Prezident İlham Əliyev çıxışında vurğuladı ki, enerji əməkdaşlığı tərəflər arasında uzunmüddətli etimad və qarşılıqlı fayda üzərində qurulub.

Dövlət başçısı bildirdi: “Tərəfdaşlığımızın mühüm hissəsi hər zaman enerji əməkdaşlığı olub, var və birmənalı olaraq olacaq. Həmin vaxtdan etibarən biz həm həcm, həm də ölkələrin sayı baxımından Avropa ölkələrinə qaz ixracımızı artırmışıq. Bu gün Avropa İttifaqının 10 üzvü Azərbaycandan qazı qəbul edir və ölkələrin ümumi sayı 16-ya çatıb. Bu göstəriciyə görə biz dünyada boru kəməri ilə qazı təchiz edən bir nömrəli ölkəyik.”

Prezident İlham Əliyev qeyd etdi ki, bu göstərici yalnız iqtisadi deyil, həm də siyasi əhəmiyyət daşıyır: Azərbaycan Avropanın enerji təhlükəsizliyində etibarlı tərəfdaşdır. Eyni zamanda, Azərbaycan qazının müxtəlif Avropa ölkələrinə çatdırılması enerji bazarının şaxələndirilməsinə və qlobal enerji sabitliyinə töhfə verir.

Antonio Koşta isə bu əməkdaşlığın Avropa üçün strateji əhəmiyyətini belə ifadə etdi: “Prezident Əliyevin söylədiyi kimi, enerji təhlükəsizliyi ikitərəfli əməkdaşlığımızın təməlini təşkil edir… Bu gün nəticə göz qabağındadır. İran və digər regional proseslərin təsiri fonunda enerji sahəsində hazırkı tərəfdaşlığımız heç zaman olmadığı kimi daha əhəmiyyətlidir.”

Azərbaycan yalnız təbii qaz ixracı ilə deyil, həm də bərpaolunan enerji sahəsində Avropaya strateji dəstək göstərir. Prezident İlham Əliyev vurğuladı: “Enerji sahəsində əməkdaşlığımızın digər istiqaməti bərpaolunan enerji ilə bağlıdır ki, onun da böyük potensialı var. Biz külək, Günəş və su elektrik enerjisinə böyük sərmayələr yatırırıq. Planımız beş və ya altı il ərzində ixraca hazır olan 6–8 giqavatlıq bərpaolunan enerjiyə malik olmaqdır.”

Bu, Avropanın enerji keçidini dəstəkləmək və həmçinin qlobal ekoloji standartlara cavab verən enerji tədarükünü təmin etmək üçün strateji imkan yaradır. Bakıda keçirilən görüşdə tərəflər həmçinin enerji infrastrukturunun modernləşdirilməsi, dəniz dibi kabelləri və ötürmə xətləri üzərində əməkdaşlığı müzakirə etdilər ki, bu da qarşılıqlı faydalı layihələrin həyata keçirilməsi üçün əsas rol oynayır.

Beləliklə, Avropa İttifaqı üçün enerji təhlükəsizliyinin təmin olunmasında Azərbaycanın rolu artmaqda davam edir. Prezident İlham Əliyevin rəhbərliyi altında həyata keçirilən enerji strategiyası yalnız ölkəmizin iqtisadi potensialını artırmır, həm də Avropanın strateji maraqlarını dəstəkləyən etibarlı tərəfdaş imicini gücləndirir. Antonio Koştanın Azərbaycana səfəri və birgə bəyanat bu əməkdaşlığın həm siyasi, həm də iqtisadi baxımdan davamlı və perspektivli olduğunu təsdiqləyir.

Mehrac Gözəlov,

YAP Neftçala rayon təşkilatı ərazi partiya təşkilatının sədri

Salyan RQİİ-nin Neftçala xidmət sahəsi üzrə rəsi müavini