Müasir dövrdə dövlətlərarası münasibətlərin inkişaf dinamikasını müəyyən edən əsas amillər sırasında iqtisadi və energetika sahəsində əməkdaşlıq xüsusi yer tutur. Bu baxımdan Azərbaycan ilə Ukrayna arasında formalaşmış tərəfdaşlıq modeli məhz real iqtisadi nəticələrə və qarşılıqlı faydalı əməkdaşlığa əsaslanaraq strateji məzmununu daha da gücləndirir. Prezident İlham Əliyevin Prezident Volodimir Zelenskinin Azərbaycana səfəri zamanı mətbuata verdiyi bəyanat bu sahənin ikitərəfli münasibətlərdə aparıcı rol oynadığını bir daha təsdiq edir.

Dövlət başçısı çıxışında xüsusi vurğulamışdır ki, siyasi dialoqla yanaşı, iqtisadi və energetika sahəsində əməkdaşlıq Azərbaycan–Ukrayna əlaqələrinin əsas sütunlarından biridir. Prezident İlham Əliyev qeyd etmişdir: “Müzakirə olunan məsələlər arasında siyasi dialoqdan başqa, xüsusilə energetika sahəsində əməkdaşlığı qeyd etmək istərdim.” Bu fikir onu göstərir ki, tərəflər münasibətlərin inkişafında iqtisadi amili prioritet istiqamətlərdən biri kimi qiymətləndirirlər.

Energetika sahəsində əməkdaşlığın ən mühüm göstəricilərindən biri Azərbaycanın dövlət enerji şirkəti olan SOCARın Ukraynada uzun illərdir uğurla fəaliyyət göstərməsidir. Prezident İlham Əliyevin sözləri ilə desək: “SOCAR Ukraynada uzun illərdir ki, uğurla fəaliyyət göstərir.” Bu fəaliyyət yalnız kommersiya xarakteri daşımır, eyni zamanda iki ölkə arasında iqtisadi əlaqələrin dərinləşməsinə və enerji təhlükəsizliyi sahəsində qarşılıqlı etimadın möhkəmlənməsinə xidmət edir.

SOCAR-ın Ukrayna bazarındakı fəaliyyəti Azərbaycan kapitalının beynəlxalq miqyasda uğurlu inteqrasiyasının bariz nümunəsi olmaqla yanaşı, iki ölkə arasında uzunmüddətli iqtisadi tərəfdaşlığın praktik əsaslarını formalaşdırır. Bu fəaliyyət nəticəsində enerji təchizatı, logistika və yanacaq bazarı sahələrində mühüm nailiyyətlər əldə edilmişdir ki, bu da əməkdaşlığın real nəticələrini əyani şəkildə nümayiş etdirir.

Bununla yanaşı, Prezident İlham Əliyev mövcud nailiyyətlərlə kifayətlənmədiklərini, gələcək üçün daha geniş perspektivlərin mövcud olduğunu da xüsusi qeyd etmişdir. Dövlət başçısı vurğulamışdır ki, bu gün aparılan müzakirələr çərçivəsində yeni birgə layihələr, təşəbbüslər və sərmayə qoyuluşu imkanları ətraflı şəkildə nəzərdən keçirilmişdir. Bu isə onu göstərir ki, Azərbaycan–Ukrayna iqtisadi əməkdaşlığı statik deyil, daim inkişaf edən və yeni məzmun qazanan prosesdir.

İqtisadi əməkdaşlığın mühüm göstəricilərindən biri də ticarət dövriyyəsinin dinamikasıdır. Prezident İlham Əliyevin qeyd etdiyi kimi, iki ölkə arasında ticarət dövriyyəsi artıq yarım milyard dolları ötüb. Bu rəqəm münasibətlərin iqtisadi əsaslarının kifayət qədər möhkəm olduğunu göstərməklə yanaşı, mövcud potensialın tam reallaşdırılmadığını da ortaya qoyur. Dövlət başçısı bu məsələyə toxunaraq bildirmişdir ki, qarşıdakı illərdə bu göstəricinin daha da artırılması üçün geniş imkanlar mövcuddur.

Bu yanaşma onu deməyə əsas verir ki, Azərbaycan və Ukrayna iqtisadi əməkdaşlığın dərinləşdirilməsi istiqamətində məqsədyönlü siyasət həyata keçirir. Xüsusilə investisiya qoyuluşu, birgə layihələrin icrası və yeni bazar imkanlarının araşdırılması istiqamətində aparılan müzakirələr gələcəkdə daha böyük iqtisadi nəticələrin əldə olunacağına zəmin yaradır.

Energetika sahəsində əməkdaşlıq isə yalnız iqtisadi deyil, eyni zamanda geosiyasi əhəmiyyətə malikdir. Azərbaycanın enerji resursları və bu sahədə əldə etdiyi təcrübə Ukrayna üçün mühüm əhəmiyyət kəsb edir. Eyni zamanda, Ukraynanın tranzit imkanları və regional mövqeyi bu əməkdaşlığı qarşılıqlı faydalı və strateji baxımdan əhəmiyyətli edir. Beləliklə, energetika sahəsində əməkdaşlıq iki ölkə arasında münasibətlərin dərinləşməsinə xidmət edən əsas amillərdən birinə çevrilir.

Prezident İlham Əliyevin bəyanatında səsləndirilən fikirlər bir daha göstərir ki, Azərbaycan–Ukrayna münasibətlərində iqtisadi və energetika sahəsi artıq köməkçi deyil, aparıcı rol oynayan istiqamətə çevrilmişdir. Bu sahədə əldə olunan nəticələr və mövcud perspektivlər tərəfdaşlığın dayanıqlı və uzunmüddətli inkişafını təmin edən əsas faktor kimi çıxış edir.

Zakir Əliyev,

YAP Neftçala rayon təşkilatı ərazi partiya təşkilatının sədri

Neftçala Peşə Məktəbi PHŞ-nin əməkdaşı