Azərbaycan Respublikasının Prezidenti İlham Əliyev və İtaliya Respublikası Nazirlər Şurasının sədri Ciorcia Meloni arasında 2026-cı il mayın 4-də Bakıda keçirilmiş görüş zamanı səsləndirilən fikirlər bir daha təsdiqlədi ki, Azərbaycan regionda sülhün və sabitliyin təmin olunması istiqamətində ardıcıl və prinsipial siyasət həyata keçirir. Dövlət başçısının bəyanatında vurğulandığı kimi, postmünaqişə dövründə formalaşmış yeni reallıqlar fonunda Azərbaycan sülh gündəliyinin əsas təşəbbüskarı kimi çıxış edir və bu istiqamətdə konkret addımlar atır.

Məlumdur ki, Azərbaycan öz ərazi bütövlüyünü və suverenliyini tam bərpa etdikdən sonra regionda uzunmüddətli sülhün təmin olunmasını prioritet vəzifə kimi müəyyənləşdirib. Prezident İlham Əliyevin çıxışında da qeyd olunduğu kimi, Ermənistanla münasibətlərin normallaşdırılması və sülh müqaviləsinin imzalanması istiqamətində irəli sürülən təşəbbüslər Azərbaycanın konstruktiv mövqeyinin bariz nümunəsidir. Bu təşəbbüslər beynəlxalq hüququn norma və prinsiplərinə əsaslanmaqla regionda dayanıqlı sabitliyin təmin olunmasına xidmət edir.

Görüş zamanı İtaliya tərəfinin də bu prosesə verdiyi dəstək xüsusi diqqət çəkdi. Ciorcia Meloni öz bəyanatında Azərbaycan ilə Ermənistan arasında normallaşma prosesini dəstəklədiklərini bildirərək, regionda sülhün və əməkdaşlığın bərqərar olmasının vacibliyini vurğuladı. Bu yanaşma onu göstərir ki, Azərbaycanın irəli sürdüyü sülh təşəbbüsləri beynəlxalq ictimaiyyət tərəfindən müsbət qarşılanır və dəstəklənir.

Prezident İlham Əliyev bəyanatında regionda yaranmış yeni reallıqların qəbul edilməsinin vacibliyini qeyd edərək bildirmişdir ki, davamlı sülh yalnız bu reallıqlar əsasında qurula bilər. Azərbaycanın mövqeyi ondan ibarətdir ki, dövlətlərin ərazi bütövlüyü və suverenliyi beynəlxalq münasibətlərin əsas prinsipi kimi qəbul olunmalı və bu prinsipdən kənara çıxılmamalıdır. Bu yanaşma regionda sabitliyin təmin olunması üçün fundamental əhəmiyyət kəsb edir.

Eyni zamanda, Azərbaycan yalnız siyasi səviyyədə deyil, praktiki müstəvidə də sülhə xidmət edən addımlar atır. Azad edilmiş ərazilərdə genişmiqyaslı bərpa və quruculuq işlərinin aparılması, kommunikasiyaların açılması təşəbbüsləri və regional əməkdaşlıq layihələrinin irəli sürülməsi sülh gündəliyinin real məzmununu təşkil edir. Bu proseslər regionun iqtisadi inteqrasiyasına və qarşılıqlı asılılığın artmasına şərait yaradır ki, bu da uzunmüddətli sabitliyin əsas şərtlərindən biridir.

İtaliya ilə əməkdaşlıq da bu baxımdan mühüm əhəmiyyət daşıyır. Avropa dövlətlərinin Azərbaycanın sülh təşəbbüslərinə dəstək verməsi regionda balanslı və dayanıqlı təhlükəsizlik mühitinin formalaşmasına töhfə verir. Bu, eyni zamanda Azərbaycanın beynəlxalq nüfuzunun artmasının və həyata keçirdiyi siyasətin düzgünlüyünün göstəricisidir.

Qeyd olunmalıdır ki, Azərbaycanın təşəbbüsləri yalnız regional çərçivə ilə məhdudlaşmır. Ölkəmiz qlobal səviyyədə də sülhün, dialoqun və əməkdaşlığın təşviqinə töhfə verən mühüm aktor kimi çıxış edir. Bu siyasət Prezident İlham Əliyevin rəhbərliyi ilə ardıcıl şəkildə həyata keçirilir və beynəlxalq aləmdə yüksək qiymətləndirilir.

Gülrux Nağıyeva,

YAP Neftçala rayon təşkilatı ərazi partiya təşkilatının sədr müavini

Neftçala rayon Heydər Əliyev Mərkəzinin baş fond mühafizi