2026-cı il mayın 4-də Prezident İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxışı zamanı regionda formalaşan yeni siyasi reallıqlara dair mühüm mesajlar verdi. Dövlət başçısının çıxışında diqqət çəkən əsas məqamlardan biri Ermənistanın 2028-ci ildə Zirvə toplantısının Azərbaycanda keçirilməsinə dəstək verməsi oldu. Bu fakt təkcə diplomatik nəzakət nümunəsi deyil, həm də Cənubi Qafqazda postmünaqişə mərhələsinin yeni siyasi məzmun qazandığını göstərən mühüm hadisə kimi qiymətləndirilməlidir.

Prezident İlham Əliyev çıxışında bildirdi ki, bir il əvvəl Tiranada keçirilmiş Zirvə toplantısı çərçivəsində Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula fon der Lyayen tərəfindən Ermənistanda keçiriləcək Zirvə görüşünə münasibəti soruşularkən Azərbaycan tərəfi bu təşəbbüsü dəstəkləyib. Bununla yanaşı, dövlətimizin başçısı balanslı yanaşmanın qorunması məqsədilə növbəti Zirvə toplantılarından birinin Azərbaycanda keçirilməsi təklifini irəli sürüb və bu təklif qəbul edilib. Ən diqqətçəkən məqamlardan biri isə Ermənistanın da Azərbaycanın namizədliyini dəstəkləməsi oldu.

Bu yanaşma Prezident İlham Əliyevin uzun illərdir həyata keçirdiyi rasional və praqmatik xarici siyasətin nəticəsidir. Azərbaycan bölgədə qarşıdurma deyil, əməkdaşlıq və qarşılıqlı etimad mühiti formalaşdırmağa çalışan dövlət kimi çıxış edir. Xüsusilə 44 günlük Vətən müharibəsindən sonra Azərbaycanın nümayiş etdirdiyi siyasi iradə regionda tamamilə yeni geosiyasi konfiqurasiya yaradıb. Bu gün Ermənistanın belə beynəlxalq platformada Azərbaycanın təşəbbüsünü dəstəkləməsi reallıqların dəyişdiyini və rəsmi İrəvanın artıq yeni siyasi şərtləri qəbul etməyə başladığını nümayiş etdirir.

Prezident İlham Əliyevin “Biz cəmi doqquz aydır ki, sülh şəraitindəyik və sülhdə yaşamağı öyrənirik” fikri isə xüsusi siyasi məna daşıyır. Bu ifadə göstərir ki, Azərbaycan sülh prosesinə formal diplomatik prosedur kimi deyil, uzunmüddətli regional təhlükəsizlik və sabitlik layihəsi kimi yanaşır. Dövlət başçısının çıxışında hiss olunan əsas xətt ondan ibarət idi ki, bölgədə yaranmış yeni vəziyyət artıq geri dönüşü olmayan mərhələyə qədəm qoyub.

Əslində Ermənistanın Azərbaycanın namizədliyini dəstəkləməsi həm də beynəlxalq ictimaiyyətə verilmiş siyasi mesajdır. Bu addım bir daha təsdiqləyir ki, Azərbaycan regionda sabitliyin əsas təminatçısıdır və sülh gündəliyinin müəllifi kimi çıxış edir. Uzun illər işğal və separatizmlə üzləşmiş dövlətin bu gün regionda dialoq, əməkdaşlıq və beynəlxalq platformaların təşkili təşəbbüsü ilə çıxış etməsi Azərbaycanın siyasi və diplomatik gücünün göstəricisidir.

2028-ci ildə “Avropa Siyasi Birliyi” Zirvə toplantısının Azərbaycanda keçirilməsi ölkəmizin beynəlxalq nüfuzunun növbəti təsdiqi olacaq. Son illərdə Azərbaycan qlobal və regional miqyaslı tədbirlərin keçirildiyi əsas siyasi mərkəzlərdən birinə çevrilib. Qoşulmama Hərəkatına uğurlu sədrliyi, COP29-a ev sahibliyi, beynəlxalq enerji və nəqliyyat layihələrində aparıcı rol Azərbaycanın artan geosiyasi çəkisini açıq şəkildə nümayiş etdirir. “Avropa Siyasi Birliyi” kimi mühüm platformanın da Azərbaycana etimad göstərməsi Prezident İlham Əliyevin uğurlu diplomatiyasının nəticəsidir.

Digər mühüm məqam isə Azərbaycanın balanslı və prinsipial siyasətinin artıq beynəlxalq miqyasda qəbul olunmasıdır. Prezident İlham Əliyevin çıxışında vurğuladığı kimi, Azərbaycan Ermənistanda keçiriləcək tədbirə dəstək verməklə konstruktiv mövqe nümayiş etdirdi. Eyni yanaşmanın Ermənistandan da gəlməsi bölgədə etimad quruculuğu baxımından mühüm siqnaldır. Bu, həm də onu göstərir ki, regionda dayanıqlı sülh üçün real imkanlar yaranıb.

Bu gün Cənubi Qafqaz yeni mərhələyə qədəm qoyur. Bu mərhələnin əsas müəllifi isə hərbi-siyasi qələbəsini diplomatik üstünlüyə çevirən Azərbaycandır. Prezident İlham Əliyevin rəhbərliyi ilə həyata keçirilən strateji kurs nəticəsində ölkəmiz təkcə öz ərazi bütövlüyünü və suverenliyini təmin etmədi, eyni zamanda bölgədə yeni əməkdaşlıq platformasının əsasını formalaşdırdı.

“Avropa Siyasi Birliyi”nin 2028-ci ildə Azərbaycanda keçirilməsi ilə bağlı qərar və Ermənistanın bu qərarı dəstəkləməsi bir daha təsdiq edir ki, Azərbaycan artıq regionun siyasi gündəliyini müəyyən edən əsas aktordur. Bu reallıq isə Prezident İlham Əliyevin uzaqgörən siyasətinin və milli maraqlara əsaslanan dövlət idarəçiliyinin məntiqi nəticəsidir.

Zülfəli Muradov,

YAP Neftçala rayon təşkilatı ərazi partiya təşkilatının sədri