2026-cı il mayın 4-də Prezident İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxışı zamanı regionda formalaşan yeni siyasi reallıqlara və Azərbaycan–Ermənistan münasibətlərinin gələcək perspektivlərinə dair mühüm mesajlar verdi. Dövlət başçısının çıxışının yekun hissəsində səsləndirdiyi fikirlər bir daha nümayiş etdirdi ki, Azərbaycan postmünaqişə dövründə sülh gündəliyinə sadiq qalan və regionda davamlı sabitliyin təmin olunması üçün ardıcıl siyasət həyata keçirən əsas tərəfdir.

Prezident İlham Əliyev çıxışının sonunda Ermənistanın Baş naziri Nikol Paşinyanı “Avropa Siyasi Birliyi”nin Zirvə toplantısının Ermənistanda keçirilməsi münasibətilə təbrik etdi və vurğuladı ki, prosesə mane olmaq istəyən tərəflərin bütün səylərinə baxmayaraq, Azərbaycan sülh gündəliyinə sadiqdir. Dövlət başçısının bu mesajı əslində regionda gedən proseslərin mahiyyətini və Azərbaycanın strateji yanaşmasını tam şəkildə ortaya qoyur.

Son illər ərzində Cənubi Qafqazda baş verən proseslər göstərdi ki, regionda yeni geosiyasi reallıqlar formalaşıb və bu reallıqların əsas müəllifi Azərbaycandır. Prezident İlham Əliyevin rəhbərliyi ilə həyata keçirilən uğurlu siyasət nəticəsində Azərbaycan öz ərazi bütövlüyünü və suverenliyini tam təmin etməklə yanaşı, postmünaqişə dövrünün siyasi gündəliyini də müəyyənləşdirən əsas aktora çevrilib. Bu gün regionda sülh və əməkdaşlıq perspektivlərinin yaranması məhz Azərbaycanın nümayiş etdirdiyi siyasi iradənin nəticəsidir.

Prezident İlham Əliyevin çıxışında diqqət çəkən əsas məqamlardan biri də Ermənistan tərəfinin artıq sülh prosesinin reallığını qəbul etməsi ilə bağlı idi. Dövlət başçısının vurğuladığı kimi, ermənistanlı həmkarının çıxışında səslənən fikirlər də Azərbaycanın sülh gündəliyinə sadiqliyini və bu prosesin alternativsiz olduğunu təsdiqləyir. Bu, regionda uzun illər davam etmiş qarşıdurma və düşmənçilik siyasətindən sonra yeni mərhələnin formalaşdığını göstərən mühüm siyasi mesajdır.

Əslində bu gün regionda sülh prosesinə mane olmaq istəyən qüvvələrin mövcudluğu sirr deyil. Müxtəlif beynəlxalq dairələr, bəzi siyasi mərkəzlər və ayrı-ayrı təsisatların nümayəndələri regionda yaranmış yeni reallıqları qəbul etmək istəmirlər. Azərbaycanın öz suverenliyini və ərazi bütövlüyünü tam təmin etməsi, separatizmə son qoyması və bölgədə yeni əməkdaşlıq modelinin əsasını formalaşdırması müəyyən dairələrin maraqlarına uyğun gəlmir. Buna görə də zaman-zaman regionda gərginliyi artırmağa, sülh prosesinə mane olmağa yönəlmiş addımların şahidi oluruq.

Lakin Prezident İlham Əliyevin çıxışında xüsusi vurğulandığı kimi, bütün bu cəhdlərə baxmayaraq Azərbaycan öz prinsipial mövqeyindən geri çəkilmir. Dövlətimizin başçısı dəfələrlə bəyan edib ki, regionda davamlı sülhün təmin olunması Azərbaycanın strateji prioritetidir. Bu gün ölkəmizin həyata keçirdiyi siyasət revanşizmə deyil, əməkdaşlığa, qarşıdurmaya deyil, qarşılıqlı faydalı münasibətlərə əsaslanır.

Azərbaycanın sülh gündəliyinə sadiqliyi artıq konkret addımlarda da özünü göstərir. Kommunikasiyaların açılması, tranzit imkanlarının genişləndirilməsi, Ermənistana yük daşımalarının həyata keçirilməsi və iqtisadi əlaqələrin formalaşdırılması bunun bariz nümunəsidir. Prezident İlham Əliyevin rəhbərliyi ilə həyata keçirilən siyasət regionu yeni əməkdaşlıq məkanına çevirməyi hədəfləyir.

Bu gün beynəlxalq ictimaiyyət də Azərbaycanın bölgədə yaratdığı yeni reallıqları qəbul edir. Ölkəmizin təşəbbüsü ilə formalaşan regional əməkdaşlıq modeli artıq qlobal səviyyədə də diqqətlə izlənilir. Azərbaycanın beynəlxalq nüfuzunun artması, mühüm siyasi və iqtisadi layihələrin mərkəzində yer alması Prezident İlham Əliyevin uzaqgörən və milli maraqlara əsaslanan siyasətinin nəticəsidir.

Prezident İlham Əliyevin “Avropa Siyasi Birliyi”nin Zirvə toplantısındakı çıxışı bir daha göstərdi ki, Azərbaycan regionun gələcəyini müəyyənləşdirən əsas siyasi gücdür. Ölkəmiz sülhə, sabitliyə və əməkdaşlığa əsaslanan yeni regional düzənin formalaşdırılması istiqamətində qətiyyətli siyasət həyata keçirir. Bu siyasətin alternativi yoxdur və region dövlətləri artıq yeni reallıqlarla hesablaşmağa başlayıblar.

Azərbaycanın sülh gündəliyinə sadiqliyi, prinsipial mövqeyi və konstruktiv təşəbbüsləri Cənubi Qafqazın gələcək inkişafının əsas təminatıdır. Prezident İlham Əliyevin rəhbərliyi ilə ölkəmiz bundan sonra da regionda davamlı sülhün və təhlükəsizliyin təmin olunması istiqamətində ardıcıl fəaliyyətini davam etdirəcək.

Günel Əliyeva,

YAP Neftçala rayon təşkilatı ərazi partiya təşkilatının sədr müavini

Həsənabad qəsəbə 2 nömrəli KEUB-un direktoru, partiya fəalı