Kənd təsərrüfatının mühüm istiqamətlərindən biri olan heyvandarlıq ölkələrin ərzaq təhlükəsizliyi sistemində xüsusi yer tutur. Əhalinin keyfiyyətli və təhlükəsiz qida məhsulları ilə təmin olunmasında, kənd yerlərində məşğulluğun artırılmasında və aqrar iqtisadiyyatın inkişafında bu sahənin rolu böyükdür. Buna görə də dünyanın bir çox ölkələrində olduğu kimi, Azərbaycanda da heyvandarlığın inkişafı dövlət siyasətinin prioritet istiqamətlərindən biri kimi müəyyənləşdirilib.

Son illərdə ölkəmizdə heyvandarlıq sektorunun inkişafı məqsədilə ardıcıl tədbirlər həyata keçirilib, müasir təsərrüfatların yaradılması təşviq olunub, damazlıq işinin təkmilləşdirilməsi, yem bazasının möhkəmləndirilməsi və məhsuldarlığın artırılması istiqamətində mühüm addımlar atılıb. Dövlət dəstəyi mexanizmlərinin genişləndirilməsi və kənd təsərrüfatına yönəldilən investisiyalar bu sahədə yeni inkişaf mərhələsinin formalaşmasına imkan yaradıb.

Prezident İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər heyvandarlıq sektorunun gələcək inkişaf istiqamətlərini də müəyyənləşdirir. Dövlət başçısı qeyd edib ki, Azərbaycan hazırda özünü mal əti ilə 84 faiz təmin edir, təxminən 150 min ton daxili istehsal mövcuddur və 30 min ton məhsul idxal edilir. Bu göstəricilər ölkənin heyvandarlıq sahəsində mühüm nəticələr əldə etdiyini nümayiş etdirsə də, eyni zamanda qarşıda duran vəzifələri də aydın şəkildə ortaya qoyur.

Müasir dövrdə ərzaq təhlükəsizliyi yalnız məhsul istehsalının həcmi ilə deyil, həm də daxili tələbatın dayanıqlı şəkildə yerli istehsal hesabına qarşılanması ilə ölçülür. Bu baxımdan mal əti istehsalında özünütəminat səviyyəsinin daha da yüksəldilməsi Azərbaycanın aqrar siyasətinin mühüm istiqamətlərindən biridir. Daxili istehsalın artırılması ölkənin xarici bazarlardan asılılığını azaltmaqla yanaşı, qiymət sabitliyinin qorunmasına və ərzaq təminatının möhkəmlənməsinə də xidmət edir.

Heyvandarlığın inkişafı ilk növbədə yem bazasının gücləndirilməsi ilə sıx bağlıdır. Son illərdə yem bitkilərinin əkin sahələrinin genişləndirilməsi, yeni suvarma imkanlarının yaradılması və müasir aqrotexniki yanaşmaların tətbiqi bu istiqamətdə mühüm nəticələr əldə olunmasına şərait yaradıb. Eyni zamanda damazlıq heyvandarlığın inkişafı, məhsuldar cinslərin artırılması və baytarlıq xidmətlərinin təkmilləşdirilməsi də istehsal göstəricilərinin yüksəlməsinə müsbət təsir göstərir.

Bu sahənin inkişafı yalnız ərzaq təminatı baxımından deyil, regionların sosial-iqtisadi inkişafı nöqteyi-nəzərindən də böyük əhəmiyyət daşıyır. Heyvandarlıq minlərlə kənd sakininin əsas məşğulluq mənbələrindən biridir. Yeni təsərrüfatların yaradılması, istehsalın genişləndirilməsi və məhsuldarlığın artırılması kənd yerlərində gəlirlərin yüksəlməsinə, əhalinin rifahının yaxşılaşmasına və iqtisadi fəallığın artmasına imkan verir.

Prezident İlham Əliyevin müşavirədə vurğuladığı məsələlər göstərir ki, qarşıdakı dövrdə heyvandarlıq sektorunda əsas məqsəd mövcud nailiyyətləri daha da inkişaf etdirmək, daxili istehsalın həcmini artırmaq və mal əti üzrə özünütəminat səviyyəsini yüksəltməkdir. Bu istiqamətdə həyata keçiriləcək tədbirlər ölkənin ərzaq təhlükəsizliyinin daha da möhkəmlənməsinə və aqrar sektorun dayanıqlı inkişafına mühüm töhfə verəcək.

Bu gün Azərbaycanın heyvandarlıq sahəsində qazandığı nəticələr həyata keçirilən məqsədyönlü dövlət siyasətinin uğurlarını əks etdirir. Qarşıya qoyulan yeni hədəflər isə daxili tələbatın yerli istehsal hesabına tam təmin olunmasına, idxaldan asılılığın minimuma endirilməsinə və ölkənin ərzaq təhlükəsizliyinin daha da gücləndirilməsinə xidmət edir. Bu məqsədlərə nail olunması Prezident İlham Əliyevin rəhbərliyi ilə həyata keçirilən aqrar inkişaf strategiyasının mühüm nəticələrindən biri olacaq.

Aqşin Hüseynli,

YAP Neftçala rayon təşkilatı ərazi partiya təşkilatının sədri

Neftçala rayon Uşaq-Gənclər İdman-Şahmat məktəbinin direktoru