Torpaq hər bir ölkənin ən mühüm strateji sərvətlərindən biridir. Xüsusilə kənd təsərrüfatının inkişafında torpaq resurslarının qorunması, düzgün idarə olunması və səmərəli istifadəsi ərzaq təhlükəsizliyinin təmin edilməsində həlledici rol oynayır. Müasir dövrdə əhalinin artması, iqlim dəyişikliklərinin təsirləri və kənd təsərrüfatı məhsullarına tələbatın yüksəlməsi mövcud torpaq ehtiyatlarından daha rasional istifadə olunmasını zəruri edir.

Azərbaycanın aqrar inkişaf strategiyasında da torpaq məsələsi xüsusi yer tutur. Son illərdə kənd təsərrüfatının inkişafı istiqamətində həyata keçirilən dövlət proqramları, meliorasiya və irriqasiya layihələri, torpaq fondunun səmərəli idarə olunmasına yönəlmiş tədbirlər bu sahədə mühüm nəticələrin əldə edilməsinə imkan yaradıb. Məqsəd yalnız əkin sahələrinin genişləndirilməsi deyil, eyni zamanda hər qarış torpaqdan maksimum səmərə ilə istifadə edilməsidir.

Prezident İlham Əliyevin kənd təsərrüfatı məsələlərinə həsr olunmuş müşavirədə toxunduğu əsas məsələlərdən biri də məhz torpaqlardan səmərəli istifadə ilə bağlı olub. Dövlət başçısı qeyd edib ki, torpaq fondundan düzgün istifadə edilməli, əkinəyararlı torpaqların təyinatı üzrə istifadəsi təmin olunmalı və mövcud potensialdan maksimum faydalanılmalıdır. Bu yanaşma aqrar sahədə qarşıya qoyulan yeni hədəflərin əsas istiqamətlərindən birini təşkil edir.

Torpaq ehtiyatlarından səmərəli istifadə ilk növbədə məhsuldarlığın artırılması deməkdir. Müasir aqrotexniki üsulların tətbiqi, düzgün əkin dövriyyəsinin təşkili, torpaqların münbitliyinin qorunması və su təminatının yaxşılaşdırılması kənd təsərrüfatında yüksək nəticələrin əldə olunmasının əsas şərtləridir. Bu istiqamətdə aparılan işlər torpaq resurslarının uzunmüddətli dövrdə də kənd təsərrüfatının inkişafına xidmət etməsini təmin edir.

Müşavirədə səsləndirilən fikirlər bir daha göstərir ki, Azərbaycanın qarşısında duran əsas vəzifələrdən biri istifadəsiz qalan torpaqların dövriyyəyə cəlb olunması və əkinəyararlı sahələrin məhsuldarlığının artırılmasıdır. Xüsusilə işğaldan azad edilmiş ərazilərdə həyata keçirilən genişmiqyaslı bərpa və quruculuq işləri kənd təsərrüfatının inkişafı üçün yeni imkanlar yaradır. Qarabağ və Şərqi Zəngəzurun zəngin torpaq ehtiyatları gələcəkdə ölkənin aqrar potensialının daha da güclənməsinə mühüm töhfə verəcək.

Torpaqlardan səmərəli istifadə eyni zamanda su ehtiyatlarının düzgün idarə olunması ilə sıx bağlıdır. İqlim dəyişikliklərinin təsirlərinin daha çox hiss olunduğu bir dövrdə suvarma sistemlərinin təkmilləşdirilməsi, müasir texnologiyaların tətbiqi və su itkilərinin minimuma endirilməsi xüsusi əhəmiyyət daşıyır. Son illərdə bu istiqamətdə həyata keçirilən layihələr kənd təsərrüfatında dayanıqlı inkişafın təmin olunmasına xidmət edir.

Torpaq ehtiyatlarının qorunması və səmərəli idarə olunması yalnız aqrar sahənin deyil, bütövlükdə ölkənin iqtisadi inkişafı üçün mühüm əhəmiyyət kəsb edir. Bu siyasət kənd təsərrüfatı məhsullarının istehsalının artmasına, ərzaq təhlükəsizliyinin möhkəmlənməsinə, regionlarda məşğulluğun genişlənməsinə və əhalinin rifahının yüksəlməsinə şərait yaradır.

Prezident İlham Əliyevin müəyyən etdiyi inkişaf prioritetləri torpaq resurslarının daha səmərəli istifadəsini, məhsuldarlığın artırılmasını və aqrar sahədə müasir idarəetmə mexanizmlərinin tətbiqini nəzərdə tutur. Həyata keçirilən tədbirlər göstərir ki, torpaq ehtiyatlarının düzgün idarə olunması Azərbaycanın kənd təsərrüfatında davamlı inkişafın təmin edilməsində və ərzaq təhlükəsizliyinin gücləndirilməsində əsas amillərdən biri olaraq qalacaq.

Torpaq xalqın ən qiymətli sərvətlərindən biridir. Bu sərvətdən səmərəli istifadə isə yalnız bugünkü tələbatın ödənilməsinə deyil, həm də gələcək nəsillər üçün etibarlı ərzaq təminatının formalaşdırılmasına xidmət edir. Məhz buna görə də torpaq ehtiyatlarından rasional istifadə Azərbaycanın aqrar inkişaf strategiyasının mühüm istiqamətlərindən biri kimi öz aktuallığını qoruyur.

Əziz Əzizli,

YAP Neftçala rayon təşkilatı ərazi partiya təşkilatının sədr müavini

Neftçala DAİM-in əməkdaşı