Cənubi Qafqaz son onilliklərdə münaqişələr, geosiyasi rəqabət və təhlükəsizlik riskləri ilə xarakterizə olunan mürəkkəb region kimi tanınıb. Lakin 2020-ci ildə 44 günlük müharibə və 2023-cü ildə 23 saatlıq anti-terror əməliyyatında Azərbaycanın qələbəsi Cənubi Qafqazda yeni reallıqlar yaratdı. O zamandan bəri müşahidə olunan dinamika göstərir ki, bölgə tədricən yeni mərhələyə-əməkdaşlıq və sabitlik mərhələsinə keçid edir. Qlobal miqyasda münaqişələrin artdığı, beynəlxalq təhlükəsizlik sisteminin sarsıldığı bir dövrdə Cənubi Qafqazda sabitliyin formalaşması təsadüfi deyil. Bu, ilk növbədə region daxilində yaranmış yeni siyasi reallıqlarla bağlıdır. Xüsusilə Azərbaycan tərəfindən ərazi bütövlüyünün təmin edilməsi regionda uzun illər davam edən əsas münaqişə faktorunu aradan qaldırıb və əməkdaşlıq üçün yeni imkanlar açıb. Bu kontekstdə İlham Əliyevin siyasi kursu regionda təhlükəsizlik arxitekturasının yenidən qurulmasına yönəlmiş strateji xətt kimi çıxış edir. Onun rəhbərliyi ilə aparılan siyasət yalnız hərbi-siyasi nəticələrlə məhdudlaşmayıb, eyni zamanda post-münaqişə dövründə sülh gündəliyinin formalaşdırılmasına xidmət edib.Cənubi Qafqazın sülh, əmin-amanlıq və əməkdaşlıq məkanına çevrilməsi artıq yalnız siyasi bəyanat deyil, konkret proseslərlə müşayiət olunur. Region ölkələri arasında kommunikasiyaların açılması, iqtisadi inteqrasiyanın genişlənməsi və qarşılıqlı asılılığın artması bu prosesin əsas elementləridir.

“Azərbaycan-Gürcüstan tərəfdaşlığı regionda sabitliyin sütunlarından biri olaraq çıxış edir və bu əməkdaşlıq daha geniş regional inteqrasiyanın əsasını təşkil edir. Mövcud transformasiyanın əsas hərəkətverici qüvvəsi kimi liderlik faktoru ön plana çıxır. Bizim uzunmüddətli strateji baxışı və ardıcıl siyasəti regionda yeni təhlükəsizlik mühitinin formalaşmasında həlledici rol oynayıb. Bu yanaşma yalnız münaqişənin həlli ilə yekunlaşmayıb, həm də post-münaqişə dövründə davamlı sülhün təmin olunmasına yönəlib. Onun təşəbbüsləri regionun nəqliyyat-logistika xəritəsinin yenidən qurulmasını, enerji və iqtisadi layihələrin genişlənməsini və nəticə etibarilə qarşılıqlı faydalı əməkdaşlıq mühitinin yaradılmasını şərtləndirib”.

            Hökmalı Mirzəyev

            YAP Hacıqabul rayon təşkilatının sədr müavini