Aprelin 15-i Azərbaycan tibb elminin parlaq siması, görkəmli oftalmoloq-alim, akademik Zərifə xanım Əliyevanın anım günüdür. Onun ömür yolu yüksək intellekt, dərin bilik və insanlara sonsuz sevgi ilə yoğrulmuş bir fədakarlıq nümunəsidir.

Zərifə xanım Əliyeva Azərbaycan oftalmologiya elmini dünya səviyyəsinə yüksəldən nadir şəxsiyyətlərdəndir. Alimin elmi fəaliyyəti çoxşaxəli olub, xüsusilə görmə orqanının patologiyası və traxomanın müalicəsi sahəsində fundamental yeniliklərə imza atmışdır. Onun peşə fəaliyyəti ilə bağlı yaranan göz xəstəliklərini öyrənən tədqiqatları tibb elmində yeni bir istiqamətin əsasını qoymuşdur. Bu gərgin əməyin nəticəsi kimi, Zərifə xanım 1976-cı ildə Moskvada "Azərbaycanın bir sıra kimya müəssisələri işçilərinin görmə orqanının vəziyyəti" mövzusunda doktorluq dissertasiyasını uğurla müdafiə etmişdir. Onun elmi nailiyyətləri beynəlxalq miqyasda da yüksək qiymətləndirilmiş və o, oftalmologiya sahəsindəki dəyərli araşdırmalarına görə M.İ.Averbax adına mükafata layiq görülmüş ilk azərbaycanlı qadın alim kimi tarixə düşmüşdür.

Lakin Zərifə xanımı xalqın gözündə ucaldan təkcə onun elmi dərəcələri deyil, həm də sonsuz humanizmi və ictimai fəaliyyəti idi. O, kimsəsiz uşaqlara, valideyn himayəsindən məhrum körpələrə hər zaman doğma anası kimi qayğı göstərir, onların sağlamlığı və gələcəyi üçün var gücü ilə çalışırdı. Bir ictimai xadim kimi Azərbaycan Sülhü Müdafiə Komitəsindəki fəaliyyəti onun humanist prinsiplərinin parlaq təzahürü idi. 2023-cü ildə akademik Zərifə Əliyevanın 100 illik yubileyinin dövlət səviyyəsində qeyd olunması onun həm bir alim, həm də bir şəxsiyyət kimi Azərbaycan tarixindəki əvəzsiz yerinin təsdiqi oldu.

Bu böyük şəxsiyyətin həm ailədəki, həm də həyatdakı rolu ən uca zirvələrdə dayanırdı. Ulu Öndər Heydər Əliyev hər zaman vurğulayırdı ki, onun dövlət işindəki uğurlarında və ailəsində yaranmış yüksək mənəvi mühitdə Zərifə xanımın rolu əvəzsiz olmuşdur: “Zərifə xanım kimi həyat yoldaşım olduğuna və o, ailəmdə çox yüksək mənəvi mühit yaratdığına görə mən xoşbəxt olmuşam. Həyatımın bütün dövrlərində işlə məşğul olduğuma görə ailə məsələlərinə fikir verməyə vaxtım olmayıb. Bunların hamısı Zərifə xanımın üzərinə düşüb və o da bu vəzifəni şərəflə, sədaqətlə, çox böyük məharətlə yerinə yetirib”.

Onun mənəvi ucalığı və məğrurluğu ömrünün son anlarına qədər dəyişməz qaldı. Prezident İlham Əliyevin xatirələrində qeyd etdiyi kimi, Zərifə xanım ömrünün son günlərində belə özündən çox ətrafındakıları düşünür, ölümü böyük bir sükut və məğrurluqla qarşılayırdı: “Bizimlə keçirdiyi son günlərdə Zərifə xanım bilirdi ki, ömrü sona çatır... Onu narahat edən, onsuz qalacaq adamlar idi. Bütün ömrü boyu olduğu kimi, səssiz bir məğrurluqla əriyirdi. O, çox gözəl başa düşürdü ki, əbədiyyət qarşısında hər şey kiçikdir, müvəqqətidir, qalan ancaq yaxşılıqdır”.

Bu gün akademik Zərifə Əliyevanın nurlu xatirəsi onun qoyub getdiyi elmi irsdə, şəfa verdiyi minlərlə insanın sevincində və xalqımızın qəlbində əbədi olaraq yaşayır.

            Hökmalı Mirzəyev,

            YAP Hacıqabul rayon təşkilatının sədr müavini