“Müstəqilliyi qorumaq, saxlamaq o müstəqilliyi əldə etməkdən qat-qat çətin bir vəzifə idi”.
Bu fikir Heydər Əliyev tərəfindən Azərbaycan dövlətçiliyinin mahiyyətini və tarixi təcrübəsini dəqiq ifadə edən mühüm siyasi tezis kimi səsləndirilib. Həqiqətən də tarix göstərir ki, müstəqilliyin elan olunması qədər onun qorunması, möhkəmləndirilməsi və gələcək nəsillərə ötürülməsi böyük siyasi iradə, milli birlik və güclü dövlətçilik ənənələri tələb edir.

Azərbaycan Xalq Cümhuriyyətinin yaradılması Azərbaycan xalqının azadlıq və istiqlal arzularının gerçəkləşməsi idi. 1918-ci il mayın 28-də qəbul edilmiş İstiqlal Bəyannaməsi ilə xalqımız müstəqil dövlət qurmaq əzmini bütün dünyaya nümayiş etdirdi. Şərqdə ilk parlamentli respublika olan Azərbaycan Xalq Cümhuriyyəti demokratik idarəçilik ənənələrinin əsasını qoydu, milli dövlət atributlarını formalaşdırdı və xalqın milli özünüdərk prosesində mühüm rol oynadı.

Lakin cümhuriyyətin fəaliyyət göstərdiyi dövr son dərəcə mürəkkəb beynəlxalq şəraitlə müşayiət olunurdu. Xarici müdaxilələr, daxili siyasi çətinliklər və geosiyasi təzyiqlər nəticəsində Azərbaycan Xalq Cümhuriyyəti cəmi 23 ay fəaliyyət göstərə bildi. Bu tarixi təcrübə bir daha sübut etdi ki, müstəqilliyi əldə etmək qədər onu qorumaq da güclü dövlət idarəçiliyi və milli həmrəylik tələb edir.

1991-ci ildə Azərbaycan yenidən dövlət müstəqilliyini bərpa etsə də, ölkədə hökm sürən siyasi böhran, iqtisadi tənəzzül, idarəetmədə xaos və Ermənistanın hərbi təcavüzü dövlət müstəqilliyini ciddi təhlükə ilə üz-üzə qoymuşdu. Həmin dövrdə ölkədə vətəndaş qarşıdurması təhlükəsi yaranmış, dövlət institutları zəifləmiş, Azərbaycan parçalanma riski ilə üzləşmişdi.

Belə ağır və mürəkkəb şəraitdə xalqın tələbi ilə hakimiyyətə qayıdan Ulu Öndər Heydər Əliyev Azərbaycanın müstəqilliyini qoruyaraq dövlətçiliyin xilaskarı missiyasını həyata keçirdi. Ümummilli Liderin uzaqgörən siyasəti nəticəsində ölkədə siyasi sabitlik təmin olundu, qanunsuz silahlı birləşmələrin qarşısı alındı, dövlət idarəçiliyi sistemi bərpa edildi və müstəqil Azərbaycanın gələcək inkişaf strategiyası müəyyənləşdirildi.

Məhz Heydər Əliyevin rəhbərliyi ilə Azərbaycan müstəqil dövlət kimi beynəlxalq münasibətlər sistemində öz layiqli yerini tutmağa başladı. Milli maraqlara əsaslanan xarici siyasət kursu, iqtisadi inkişaf strategiyası və hüquqi dövlət quruculuğu istiqamətində həyata keçirilən islahatlar Azərbaycanın dövlət müstəqilliyini daha da möhkəmləndirdi. “Əsrin müqaviləsi”nin imzalanması ölkənin iqtisadi və siyasi təhlükəsizliyinin təmin olunmasında mühüm rol oynadı.

Bu gün Ulu Öndərin siyasi kursu İlham Əliyev tərəfindən uğurla davam etdirilir. Prezident İlham Əliyevin rəhbərliyi ilə Azərbaycan güclü, müasir və qalib dövlətə çevrilib. Son illərdə ölkəmizin qazandığı siyasi, iqtisadi və hərbi uğurlar müstəqilliyin etibarlı əsaslar üzərində inkişaf etdiyini göstərir.

Xüsusilə Azərbaycanın ərazi bütövlüyünün və suverenliyinin tam təmin olunması dövlətçilik tariximizin ən mühüm hadisələrindən biri kimi qiymətləndirilir. Prezident İlham Əliyevin qətiyyətli siyasəti və Azərbaycan Ordusunun qəhrəmanlığı nəticəsində işğala son qoyuldu, dövlət suverenliyi tam bərpa edildi. Bu tarixi Zəfər müstəqil Azərbaycanın gücünü və milli birliyini bütün dünyaya nümayiş etdirdi.

Bu gün Azərbaycan Bayrağının işğaldan azad olunmuş bütün ərazilərdə dalğalanması 1918-ci ildə əsası qoyulan istiqlal ideyasının və milli dövlətçilik ənənələrinin təntənəsidir. Azərbaycan xalqı artıq müstəqilliyini qorumağa qadir güclü dövlətə sahib olduğunu bütün dünyaya sübut edib.

28 May – Müstəqillik Günü yalnız tarixi hadisənin ildönümü deyil, həm də dövlət müstəqilliyinin qorunmasının nə qədər böyük məsuliyyət olduğunu xatırladan mühüm gündür. Azərbaycan xalqı bu gün müstəqilliyin əsl dəyərini anlayaraq onu qorumağın və daha da möhkəmləndirməyin milli vəzifə olduğunu dərk edir.

Müstəqilliyin qorunması güclü dövlət, milli birlik, siyasi sabitlik və xalq-iqtidar həmrəyliyi tələb edir. Müasir Azərbaycan bu prinsiplər əsasında inkişaf edərək öz müstəqilliyini əbədi və dönməz edib.

Nicat Axundzadə,

YAP Neftçala rayon təşkilatı ərazi partiya təşkilatının sədr müavini

Neftçala şəhər 4 nömrəli tam orta məktəbin tarix müəllimi