Azərbaycan tibb elminin görkəmli nümayəndəsi, akademik Zərifə Əliyevanın zəngin elmi irsi dünya oftalmologiya elminə verdiyi böyük töhfələrlə seçilir. Onun çoxşaxəli tədqiqatları, fundamental əsərləri və tibbin müxtəlif sahələrində qazandığı mühüm nailiyyətlər Azərbaycan tibb elminin inkişaf tarixində xüsusi mərhələ təşkil edir. Görkəmli alimin keçdiyi şərəfli ömür yolu bu gün hər bir həkim, alim və vətəndaş üçün kamillik, mənəviyyat və peşəkarlıq məktəbi kimi dəyərləndirilir.

Akademik Zərifə Əliyeva Azərbaycanın oftalmologiya elminin inkişafında müstəsna xidmətlər göstərmiş, bu sahənin elmi əsaslarının formalaşmasına mühüm töhfələr vermişdir. O, yalnız elmi fəaliyyətinə görə deyil, eyni zamanda yüksək mənəvi keyfiyyətləri, nəcib xüsusiyyətləri və insani dəyərlərə sadiqliyi ilə də seçilmişdir. Zərifə xanımın formalaşdığı mühit, onun həyat tərzi və insanlara yanaşması onun şəxsiyyətinin bütövlüyünü tamamlayan əsas amillərdən olmuşdur.

Onun elmi fəaliyyətində xüsusilə oftalmologiyanın aktual problemlərinin araşdırılması mühüm yer tutur. Akademik uzun illər ərzində müxtəlif sənaye müəssisələrində genişmiqyaslı tədqiqatlar aparmış, istehsalat şəraitinin insan görmə orqanına təsirini elmi əsaslarla öyrənmişdir. Bu tədqiqatlar nəticəsində “Şin istehsalatında gözün peşə patologiyası”, “Xronik yod intoksikasiyası zamanı oftalmologiya” və “Yod sənayesində gözün peşə xəstəliyinin profilaktikası” kimi dəyərli monoqrafiyalar ortaya çıxmışdır.

Zərifə Əliyeva “Azərbaycanın bir sıra kimya müəssisələri işçilərinin görmə orqanının vəziyyəti” mövzusunda doktorluq dissertasiyasını dünyanın nüfuzlu elmi mərkəzlərindən biri olan H.Helmqolts adına Moskva Elmi-Tədqiqat Göz Xəstəlikləri İnstitutunda müdafiə etmişdir. Onun bu işi oftalmologiyada peşə patologiyası sahəsində ilk fundamental tədqiqatlardan biri kimi yüksək qiymətləndirilmişdir. Bu elmi uğur 1977-ci ildə ona tibb elmləri doktoru elmi dərəcəsinin verilməsi ilə nəticələnmişdir.

Akademikin elmi fəaliyyətinin zirvə nöqtələrindən biri 1981-ci ildə ona verilən yüksək beynəlxalq elmi mükafat – M.İ. Averbax adına mükafat olmuşdur. O, bu nüfuzlu mükafata layiq görülən ilk azərbaycanlı qadın alim kimi tarixə düşmüşdür. Bu fakt təkcə onun şəxsi elmi nailiyyəti deyil, həm də Azərbaycan elminin beynəlxalq səviyyədə tanınmasının mühüm göstəricisidir.

Zərifə Əliyevanın elmi fəaliyyəti ilə yanaşı, onun humanist dəyərlərə sadiqliyi, insanlara olan qayğısı və yüksək mənəvi keyfiyyətləri də xüsusi qeyd olunmalıdır. O, insanlara nur bəxş edən, onlara diqqət və qayğısını əsirgəməyən şəxsiyyət kimi tanınmışdır. Onun həyatı boyunca nümayiş etdirdiyi fədakarlıq və peşəsinə bağlılıq Azərbaycan ziyalısının ideal obrazını formalaşdırmışdır.

Akademik Zərifə Əliyeva cəmi 61 il ömür sürsə də, onun zəngin elmi irsi və mənəvi dəyərləri bu gün də yaşayır. Onun xatirəsi dövlət tərəfindən layiqincə əbədiləşdirilmiş, Fəxri Xiyabanda məzarı üzərində tunc heykəli ucaldılmışdır. Onun həyat yolu yüksək vətənpərvərlik, elmə sədaqət və humanizm rəmzi kimi Azərbaycan xalqının yaddaşında əbədi yer tutmuşdur.

Narxanım Əzizova,

YAP Neftçala rayon təşkilatının fəal üzvü