Azərbaycan ilə Gürcüstan arasındakı əlaqələr qədim tarixi köklərə və mehriban qonşuluq ənənələrinə əsaslanır. Bu iki ölkə tarixən həm mədəni, həm də iqtisadi sahələrdə sıx əməkdaşlıq edib və bir-birinə qarşılıqlı hörmətlə yanaşıb. Müasir dövrdə bu münasibətlər strateji tərəfdaşlıq səviyyəsinə yüksələrək hər iki xalqın maraqlarına xidmət edir. Hər iki ölkə siyasi, iqtisadi, mədəni və enerji sahələrində uğurlu əməkdaşlıq edir. Bakı-Tbilisi-Ceyhan neft kəməri və Bakı-Tbilisi-Qars dəmir yolu kimi iri regional layihələr iki ölkənin strateji tərəfdaşlığının nümunəsidir. Bu layihələr yalnız Azərbaycan və Gürcüstan üçün deyil, bütövlükdə regionun inkişafı və təhlükəsizliyi üçün mühüm əhəmiyyət daşıyır. Hökumət başçılarının qarşılıqlı səfərləri bu münasibətlərin möhkəmlənməsində xüsusi rol oynayır. Azərbaycan və Gürcüstan liderlərinin mütəmadi olaraq bir araya gəlməsi iki ölkə arasındakı strateji tərəfdaşlığın daha da dərinləşdirilməsi üçün mühüm platforma yaradır. Bu səfərlər zamanı enerji, nəqliyyat, iqtisadiyyat və mədəniyyət sahələrində mühüm razılaşmalar əldə olunur, regional sabitlik və təhlükəsizlik məsələləri müzakirə edilir. Azərbaycan və Gürcüstan beynəlxalq təşkilatlarda, o cümlədən BMT, ATƏT, GUAM və QDİƏT çərçivəsində sıx əməkdaşlıq edirlər. Ölkələrimiz bir-birinin milli maraqlarını və ərazi bütövlüyünü dəstəkləyir, bu isə münasibətlərin möhkəmlənməsinə mühüm töhfə verir.Azərbaycan və Gürcüstan parlamentlərarası əlaqələri inkişaf etdirmək üçün işçi qrupları vasitəsilə sıx əməkdaşlıq edirlər. Hər iki ölkənin parlament dostluq qrupları arasında mövcud olan fəal dialoq ikitərəfli münasibətlərin güclənməsində mühüm rol oynayır.Dövlət və hökumət başçılarının qarşılıqlı səfərləri iki ölkə arasındakı əlaqələrin daha da gücləndirilməsinə xidmət edir. Azərbaycan və Gürcüstan arasında bağlanmış 123 sənəd, iki ölkə arasındakı münasibətlərin möhkəm hüquqi bazasını təşkil edir. Bu sənədlər əməkdaşlığın müxtəlif sahələrində əlaqələrin daha da inkişaf etdirilməsi üçün möhkəm zəmin yaradır.Prezident İlham Əliyevin Gürcüstanın Baş naziri İrakli Kobaxidze ilə görüşü, iki ölkə arasında dostluq və strateji tərəfdaşlıq əlaqələrinin nə qədər möhkəm olduğunu bir daha təsdiqlədi. Hər iki liderin Orta Dəhliz və digər mühüm layihələr haqqında müzakirələri göstərir ki, Azərbaycan və Gürcüstan regional və beynəlxalq əməkdaşlıqda həlledici rola malikdirlər.Bu görüş, yalnız ikitərəfli əlaqələrin inkişafına deyil, həm də regionda sabitliyin və iqtisadi inteqrasiyanın gücləndirilməsinə töhfə verir. Azərbaycan və Gürcüstanın birlikdə göstərdiyi səylər, onların Avropa ilə Asiya arasında mühüm körpü rolunu daha da möhkəmləndirəcək və yeni uğurlu layihələrin əsasını qoyacaq. İlham Əliyevin bəyanatında vurğulanan əməkdaşlıq perspektivləri, hər iki ölkənin xalqlarına və regionun inkişafına xidmət edən strateji hədəfləri əks etdirir. Şübhəsiz ki, bu görüş, Azərbaycan-Gürcüstan tərəfdaşlığının davamlı inkişafına və daha parlaq gələcəyinə doğru atılmış növbəti addım oldu.

Günel Əliyeva,

Yeni Azərbaycan Partiyası Neftçala rayon təşkilatının fəal üzvü