Biz vətənpərvərlik ruhunda, xalqa, torpağa bağlı yeni gənc nəsli yetişdirərək Qələbəmizi şərtləndirdik.

Prezident İlham Əliyev 28 May – Müstəqillik Günü münasibətilə Laçında etdiyi çıxışında Azərbaycanın tarixində mühüm rol oynayan milli ruhun və gənc nəslin vətənpərvərliyinin Zəfərin əsasını təşkil etdiyini vurğuladı. Dövlət başçısı qeyd etdi ki, bu gün əldə olunan qələbələr birdən-birə baş verməyib – bu, illərlə aparılan məqsədyönlü siyasətin, milli-mənəvi dəyərlərə əsaslanan tərbiyənin və vətəndaş həmrəyliyinin nəticəsidir.

Prezident bildirdi ki, Azərbaycanın güclü və yenilməz ordusunu formalaşdıran əsas sütun məhz vətən sevgisi ilə yoğrulmuş gənclər olub: “Biz elə bir gənc nəsil yetişdirdik ki, onlar Vətən uğrunda canından keçməyə hazır idilər. Bu ruh, bu amal bizi Qələbəyə apardı.”

Dövlət başçısı həmçinin Laçının və ümumiyyətlə Qarabağ və Şərqi Zəngəzurun azad olunmasını təkcə hərbi uğur deyil, həm də ideoloji və mənəvi zəfər kimi dəyərləndirdi. Bu zəfərin arxasında dövlətin milli-mənəvi tərbiyə siyasəti, təhsil islahatları, ordu quruculuğu və ictimai həmrəylik dayanır.

Prezident İlham Əliyev çıxışında xüsusi vurğuladı ki, Azərbaycan xalqı işğal altında qalan torpaqlarla heç vaxt vidalaşmayıb. “Biz qayıtmalı idik və qayıtmışıq” – bu sözlər, illərlə xalqın qəlbində daşıdığı ümidin və əzmin simvoluna çevrildi.

Laçında keçirilən rəsmi tədbirdə Prezident, Azərbaycanın bu bölgəyə suveren şəkildə qayıdışının yalnız siyasi deyil, həm də tarixi və mənəvi baxımdan da böyük əhəmiyyət kəsb etdiyini bildirdi. Bu gün Laçında dalğalanan üçrəngli bayraq, əslində Azərbaycanın bütövlüyünün, ərazi suverenliyinin və milli qürurunun nişanəsidir.

Prezident qeyd etdi ki, Laçın şəhərinin və ətraf rayonların yenidən qurulması, müasir infrastrukturun yaradılması və doğma yurdlarına qayıdan sakinlərin həyat şəraitinin yaxşılaşdırılması dövlətin əsas prioritetlərindəndir. “Qarabağ və Şərqi Zəngəzurda həyat canlanır, insanlar qayıdır, torpaqlarımız dirçəlir. Bu, bizim tarixi missiyamız idi və biz onu uğurla yerinə yetirdik,” – deyə dövlət başçısı vurğuladı.

Prezident İlham Əliyevin Laçında etdiyi çıxış, yalnız Müstəqillik Günü münasibətilə deyil, həm də Azərbaycanın yeni dövrünün – Zəfərdən sonra quruculuq və inkişaf mərhələsinin ideoloji əsaslarını nümayiş etdirdi. Bu çıxış həm də bir çağırış idi – Vətənə, tarixə və gələcəyə olan məsuliyyət çağırışı.

            Aytən İmanova,

            Hacıqabul rayon Heydər Əliyev Mərkəzinin direktoru,

            YAP Hacıqabul rayon təşkilatının fəalı.