Azərbaycan xalqının dövlətçilik tarixində ordu həmişə milli mübarizənin, müstəqillik ruhunun və vətənə sədaqətin simvolu olmuşdur. 26 iyun – Azərbaycan Silahlı Qüvvələri Günü, bu gün təkcə hərbçilərin deyil, bütün xalqın bayramına çevrilmişdir. Çünki ordu – xalqın özüdür. Ordunun gücü xalqın birliyindən, inamından, Vətən sevgisindən doğur.

Müstəqil Azərbaycanın ordu quruculuğu prosesi sadəcə bir struktur formalaşması yox, həm də tarix, vətəndaşlıq borcu və strateji dövlət siyasətidir.

Azərbaycan Respublikasının Silahlı Qüvvələrinin yaranma tarixi 1918-ci ilə – Azərbaycan Xalq Cümhuriyyətinə gedib çıxır. Həmin il iyunun 26-da Nazirlər Şurasının qərarı ilə ölkədə ilk dəfə olaraq milli hərbi hissələrin təşkili başlanıldı. Bu, Azərbaycanın müstəqil dövlət olaraq təhlükəsizliyini təmin etmək üçün atdığı ən önəmli addımlardan biri idi. Təəssüf ki, bu addım cəmi 23 ay yaşayan Cümhuriyyətin süqutundan sonra yarımçıq qaldı.

Lakin bu qərar tariximizdə ilk dəfə müstəqil hərbi sistemin – milli ordunun hüquqi əsaslarla yaradılmasını simvolizə edir. 80 ildən sonra bu ənənə müstəqil Azərbaycan Respublikasında bərpa edildi.

1991-ci ildə Azərbaycanın müstəqilliyini yenidən bərpa etməsi ilə milli təhlükəsizliyin təminatı məsələsi prioritetə çevrildi. Lakin o dövrdə ölkə ciddi daxili siyasi böhranlar, bölgələrdə separatizm və Ermənistanın genişmiqyaslı hərbi təcavüzü ilə üz-üzə qaldı. Silahlı Qüvvələrin formalaşmasında vahid strategiya və liderlik çatışmırdı. Bu səbəbdən Azərbaycanın müdafiə imkanları zəif idi və işğal təhlükəsi reallığa çevrilmişdi.

1993-cü ildə xalqın təkidli tələbi ilə hakimiyyətə qayıdan ümummilli lider Heydər Əliyev, dövlətin təhlükəsizliyini təmin etmək üçün ordu quruculuğunu milli prioritet elan etdi. Onun rəhbərliyi ilə həyata keçirilən genişmiqyaslı hərbi islahatlar nəticəsində Silahlı Qüvvələrin strukturlaşdırılması, kadr siyasətinin peşəkarlıq üzərində qurulması, hərbi hissələrin döyüş hazırlığının yüksəldilməsi və hərbçilərin sosial rifahının təmin olunması istiqamətində mühüm addımlar atıldı.

Heydər Əliyev deyirdi: “Müstəqil Azərbaycanın hər bir vətəndaşı bilməlidir ki, biz dövlət olaraq yalnız güclü orduya malik olduqda təhlükəsizliyimizi təmin edə bilərik.”

Onun strateji uzaqgörənliyi nəticəsində Azərbaycan Ordusu qısa müddətdə regionun ən güclü və nizamlı hərbi sistemlərindən birinə çevrildi. Həm də bu, təkcə fiziki güc yox, mənəvi güvən və milli ruhun təntənəsi idi.

1998-ci il 22 may tarixində Ulu Öndərin imzaladığı fərmanla 26 iyun tarixi Silahlı Qüvvələr Günü kimi rəsmiləşdirildi. Bu qərar tarixi ədalətin bərpası idi. Həm də bu bayram bir xalqın orduya inamının, dövlətin öz əsgərinə verdiyi dəyərin təcəssümüdür.

Hər il bu tarixdə dövlətin ali rəhbərliyi tərəfindən keçirilən tədbirlər, hərbi paradlar, təltiflər və ictimai çağırışlar Silahlı Qüvvələrin xalqın həyatındakı əhəmiyyətini bir daha göstərir.

2020-ci ildə 44 günlük Vətən Müharibəsi zamanı Azərbaycan Ordusu öz gücünü, ruhunu və peşəkarlığını bütün dünyaya sübut etdi. Müzəffər Ali Baş Komandan İlham Əliyevin rəhbərliyi altında əsgərlərimiz illərlə işğal altında olan torpaqları qəhrəmancasına azad etdilər. Bu zəfər bir daha sübut etdi ki, Azərbaycan Ordusu təkcə regionun deyil, qlobal miqyasda sayılıb-seçilən hərbi qüvvəyə çevrilmişdir.

Prezident İlham Əliyevin ifadəsi ilə: “Azərbaycan əsgəri döyüş meydanında tarix yazdı. Bu tarix – qürur tariximizdir.”

Bu gün Azərbaycan Ordusu NATO standartlarına uyğun silahlanma, müasir texnologiyalar və yüksək döyüş hazırlığı ilə təchiz olunmuşdur. Ölkədə orduya ictimai dəstək, gənclər arasında hərbi vətənpərvərlik ruhu yüksələn xətt üzrə inkişaf edir. Vətənini sevən, onun müdafiəsinə hazır olan bir gənclik yetişir. Bu isə sabahın təminatı, dövlətin dayanıqlı gələcəyidir.

26 iyun – təkcə bir tarix deyil, milli kimliyimizin, mübarizə tariximizin və qürur dolu sabahımıza olan inamın günüdür. Azərbaycan Ordusu bu xalqın ürəyindən doğub, torpağının qüruruna çevrilib. Biz bu gün Silahlı Qüvvələrimizin yanında dayanmaqla həm də dövlətçiliyimizi, azadlığımızı və gələcəyimizi qoruyuruq.

Yaşasın Azərbaycan əsgəri!

Yaşasın Azərbaycan Ordusu!

Yaşasın Müstəqil Azərbaycan!

            Dövran Həsənov,

            YAP Hacıqabul rayon təşkilatının ərazi partiya təşkilat (ƏPT) sədri.