Azərbaycan Respublikasının Prezidenti İlham Əliyevin Slovakiya Respublikasına rəsmi səfəri dekabrın 9-da başa çatıb. Bratislava şəhərinin Milan Ştefanik adına Beynəlxalq Aeroportunda Prezident İlham Əliyevin şərəfinə fəxri qarovul dəstəsi düzülmüş, dövlətimizin başçısını Slovakiya Respublikası Prezidenti Aparatının rəhbəri Peter Vodraşka və digər rəsmi şəxslər yola salmışlar.

Azərbaycanla Slovakiya arasında strateji tərəfdaşlıq əlaqələrinin dərinləşməsi Avropada formalaşan yeni geosiyasi düzən fonunda xüsusi əhəmiyyət kəsb edir. Enerji təhlükəsizliyi, müdafiə sənayesi və nəqliyyat dəhlizləri üzrə əməkdaşlığın genişləndirilməsi həm ikitərəfli münasibətlərin siyasi çəkisini artırır, həm də regionda sülh və inkişaf perspektivlərini gücləndirir. Avropa İttifaqının enerji təhlükəsizliyi xəritəsində Azərbaycan artıq strateji tərəfdaş kimi xüsusi yer tutur və Slovakiya ilə əməkdaşlıq bu mövqeyi daha da gücləndirir.

Müdafiə sənayesi üzrə tərəfdaşlıq da yeni mərhələyə keçir. Strateji tərəfdaşlıq çərçivəsində siyasi koordinasiyanın güclənməsi Azərbaycanın Avropadakı mövqelərinə də müsbət təsir edir.

Azərbaycan kimi region lideri ilə əməkdaşlıq Slovakiyaya həm enerji təhlükəsizliyi, həm nəqliyyat dəhlizlərində iştirak, həm də Mərkəzi Avropa ilə Cənubi Qafqaz arasında yeni körpü qurmaq imkanı verir.

Yeni geosiyasi reallıqlar fonunda Azərbaycan-Slovakiya strateji tərəfdaşlığı təkcə ikitərəfli deyil, həm də Avropa üçün mühüm nümunəvi modeldir. Bu əməkdaşlıq Avropa-Cənubi Qafqaz xəttində yeni siyasi yaxınlaşma mərhələsi yaradır və Azərbaycanın Avropadakı strateji rolunu daha da gücləndirir.

Maya Qənbərova,

YAP fəalı, Hacıqabul Tarix Diyarşünaslıq Muzeyinin kiçik elmi işçisi.