Azərbaycan Respublikasının Prezidenti cənab İlham Əliyevin fəaliyyəti müasir Azərbaycan dövlətçiliyinin məntiqi davamı, eyni zamanda yeni keyfiyyət mərhələsidir. Bu fəaliyyətin əsasında milli maraqlar, güclü siyasi iradə və Azərbaycan vətəndaşına xidmət prinsipi dayanır.

2024-cü il prezident seçkiləri müstəqil Azərbaycanın siyasi tarixində mühüm dönüş nöqtəsi oldu. İlk dəfə olaraq seçkilər ölkənin bütün ərazilərində, o cümlədən Xankəndidə keçirildi. Prezident İlham Əliyevin məhz Xankəndidə səs verməsi təkcə siyasi akt deyil, dövlət suverenliyinin rəmzi, separatizmə vurulan son zərbə kimi tarixə yazıldı. Bu addım Azərbaycanın ərazi bütövlüyünün dönməzliyini bütün dünyaya nümayiş etdirdi.

“Bizim siyasətimizin mərkəzində Azərbaycan vətəndaşı dayanır” prinsipi Prezident İlham Əliyevin idarəçilik fəlsəfəsinin əsasını təşkil edir. Sosial rifahın yüksəldilməsi, şəhid ailələri və qazilərə göstərilən xüsusi diqqət, insan kapitalının inkişafı bu siyasətin real nəticələridir. Dövlət-vətəndaş münasibətləri etimad və məsuliyyət üzərində qurulmuşdur.

Prezident İlham Əliyevin rəhbərliyi ilə Azərbaycan balanslı deyil, milli maraqlara əsaslanan xarici siyasət modeli formalaşdırmışdır. Qonşu dövlətlər, İslam Əməkdaşlıq Təşkilatı, Avropa ölkələri və digər beynəlxalq tərəfdaşlarla bərabərhüquqlu münasibətlər Azərbaycanın beynəlxalq nüfuzunu əhəmiyyətli dərəcədə artırmışdır. Bu gün Azərbaycan beynəlxalq əməkdaşlıqda etibarlı tərəfdaş kimi tanınır.

İqtisadi müstəqillik siyasi müstəqilliyin əsas dayağıdır. Aparılan islahatlar nəticəsində Azərbaycan dayanıqlı iqtisadi model formalaşdırmış, yeni iqtisadi rayon bölgüsü, enerji strategiyası və “Cənub Qaz Dəhlizi” kimi qlobal layihələrlə regionun aparıcı gücünə çevrilmişdir. Azərbaycanın D-8 İqtisadi Əməkdaşlıq Təşkilatına üzv qəbul edilməsi də bu siyasətin beynəlxalq təsdiqidir.

Prezident İlham Əliyevin qətiyyətli liderliyi nəticəsində Azərbaycan xalqı 30 illik işğalla barışmadı. Güclü ordu, güclü iqtisadiyyat və milli birlik 44 günlük Vətən müharibəsində tarixi Qələbəni təmin etdi. Müzəffər Ali Baş Komandanın rəhbərliyi ilə qazanılan bu Zəfər təkcə hərbi yox, siyasi və mənəvi üstünlüyün də göstəricisi oldu. Qələbənin salnaməsi yeni orden və medallarla əbədiləşdirildi, Dövlət Suverenliyi Günü təsis olundu.

Bu gün azad edilmiş ərazilərdə genişmiqyaslı quruculuq işləri aparılır. “Böyük Qayıdış” Proqramı çərçivəsində on minlərlə insan doğma yurdlarına qayıdıb. Qarabağ və Şərqi Zəngəzurda həyat yenidən canlanır, Azərbaycan Bayrağı bu torpaqlarda əbədi dalğalanır.

Prezident İlham Əliyevin fəaliyyəti Azərbaycanın dünəni, bu günü və gələcəyi arasında möhkəm körpü yaradır. Güclü dövlət, yüksək rifah cəmiyyəti və qalib xalq ideyası bu siyasətin əsas hədəfidir. Bu yol milli iradəyə, tarixi ədalətə və gələcəyə inamla aparan yoldur.

            Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.