Dünya Azərbaycanlılarının Həmrəyliyi Günü Azərbaycan xalqının milli özünüdərk tarixində xüsusi yer tutan, ümummilli birliyin və dövlətçilik ideyasının təcəssümü olan əlamətdar bayramdır. Bu günün dövlət bayramı kimi qeyd edilməsi xalqımızın milli azadlıq mübarizəsinin məntiqi nəticəsi olmaqla yanaşı, artıq möhkəm ictimai-siyasi ənənəyə çevrilmişdir.

Ümummilli Lider Heydər Əliyevin qeyd etdiyi kimi, qədim və zəngin tarixə malik Azərbaycan xalqının dirçəlişini, tərəqqisini və milli birliyini əks etdirən bu bayram hər bir azərbaycanlı üçün inam və ümid anıdır. Dünyanın müxtəlif ölkələrində milyonlarla azərbaycanlının yaşamasına baxmayaraq, onların milli-mənəvi varlığını yaşadan və bir amal ətrafında birləşdirən yeganə qüvvə müstəqil və suveren Azərbaycan dövlətidir. Məhz bu dövlət xalqımızın dilinin, dininin, milli-mənəvi dəyərlərinin və ümumbəşəri prinsiplərin qorunmasının əsas təminatçısıdır.

Dünya azərbaycanlılarının birliyi və təşkilatlanması ideyası Ulu Öndər Heydər Əliyevin məqsədyönlü və uzaqgörən siyasətinin nəticəsi olaraq formalaşmışdır. Həmrəylik gününün təsis edilməsi xalqın ideoloji bütövlüyünün möhkəmlənməsinə, milli birlik ruhunun güclənməsinə mühüm töhfə vermişdir. Bu bayram Azərbaycan xalqının harada yaşamasından asılı olmayaraq eyni kökə, eyni tarixə və eyni Vətənə bağlı olduğunu nümayiş etdirir.

Prezident İlham Əliyevin Dünya Azərbaycanlılarının III Qurultayındakı çıxışında vurğuladığı kimi, xaricdə yaşayan azərbaycanlılar böyük və ayrılmaz bir ailədir. Onları birləşdirən əsas amil Vətənə bağlılıq, Azərbaycan dövlətinə sədaqət və azərbaycançılıq məfkurəsidir. “Bizim bir vətənimiz var – Azərbaycan! Bizim bir dilimiz var – Azərbaycan dili! Bizim ümumxalq ideologiyamız var – azərbaycançılıq!” fikri bu birliyin ideoloji əsaslarını aydın şəkildə ifadə edir.

Dünya Azərbaycanlılarının Qurultayları diaspor fəaliyyətinin inkişafında yeni mərhələlərin başlanğıcı olmuşdur. Ümummilli Liderin I Qurultaydakı çıxışında qeyd etdiyi kimi, bu toplantılar xaricdə yaşayan soydaşlarımızın daha sıx həmrəyliyi və təşkilatlanması üçün mühüm platforma rolunu oynayır. Bu gün artıq Azərbaycan diasporu beynəlxalq aləmdə fəal və təsirli mövqeyə malikdir, ölkəmizin milli maraqlarının müdafiəsində uğurlu lobbiçilik fəaliyyəti həyata keçirir.

Prezident İlham Əliyevin rəhbərliyi ilə keçirilən Dünya Azərbaycanlılarının V Qurultayı – Zəfər Qurultayı isə tarixi əhəmiyyət daşıyan bir hadisə kimi yadda qalmışdır. Bu Qurultayda qəbul olunmuş “Dünya Azərbaycanlılarının V Qurultayının beynəlxalq ictimaiyyətə müraciəti” müasir dövrdə Azərbaycan həqiqətlərinin dünya ictimaiyyətinə çatdırılması baxımından mühüm siyasi sənəd olmuşdur.

Beləliklə, Dünya Azərbaycanlılarının Həmrəyliyi Günü milli birlik, Vətənə məhəbbət, milli-mənəvi dəyərlərə hörmət və dövlətə sədaqət kimi ali dəyərləri özündə ehtiva edir. Bu bayram Azərbaycan xalqının sarsılmaz birliyinin, güclü dövlətinin və parlaq gələcəyinin rəmzidir.

            Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.