2026-cı il fevralın 4-də Birləşmiş Ərəb Əmirliklərinin paytaxtı Əbu-Dabidə “Zayed İnsan Qardaşlığı Mükafatı”nın təqdimolunma mərasimində Azərbaycan Respublikasının Prezidenti İlham Əliyev çıxış edib. Dövlət başçısı bu nüfuzlu mükafatın təqdim olunmasını insanlıq, qarşılıqlı anlaşma və sülh dəyərlərinin təşviqi baxımından yüksək qiymətləndirib, mərasimin keçirildiyi məkanın və vaxtın daşıdığı simvolik mənaya diqqət çəkib.

Prezident İlham Əliyev çıxışında Azərbaycan və Ermənistan arasında sülhün bərqərar olunması istiqamətində beynəlxalq ictimaiyyətin göstərdiyi dəstəyi xüsusi vurğulayıb. O, bu prosesə verdiyi töhfəyə görə Amerika Birləşmiş Ştatlarının Prezidentinə minnətdarlığını ifadə edərək qeyd edib ki, beynəlxalq tərəfdaşların konstruktiv mövqeyi regionda davamlı sülhün əldə olunmasına mühüm töhfə verir. Dövlət başçısı bildirib ki, sülh yalnız siyasi bəyanatlarla deyil, real addımlarla möhkəmlənməlidir və Azərbaycan bu istiqamətdə prinsipial mövqe nümayiş etdirir.

Çıxışda vurğulanıb ki, Azərbaycan humanitar və iqtisadi sahələrdə etimad mühitinin formalaşdırılması üçün konkret qərarlar qəbul edib. Belə ki, Azərbaycan öz ərazisindən Ermənistana yük daşımalarına qoyulmuş məhdudiyyətləri aradan qaldırmaqla yanaşı, eyni zamanda Ermənistana neft məhsullarının ixracına da başlayıb. Prezident İlham Əliyev bu addımların regionda qarşılıqlı asılılığın və əməkdaşlığın gücləndirilməsinə xidmət etdiyini qeyd edib və bunun sülh prosesinin praktik nəticəsi olduğunu bildirib.

Dövlət başçısı çıxışında diqqətə çatdırıb ki, iqtisadi əməkdaşlıq və ticarət əlaqələrinin inkişafı xalqlar arasında etimadın möhkəmlənməsində mühüm rol oynayır. Azərbaycan tərəfindən atılan bu addımların məqsədi regionda sabitliyin təmin olunması, uzunmüddətli sülhün möhkəmləndirilməsi və gələcək əməkdaşlıq üçün sağlam zəminin yaradılmasıdır.

Prezident İlham Əliyev “Zayed İnsan Qardaşlığı Mükafatı”nın adının daşıdığı dəyərlərə toxunaraq qeyd edib ki, bu mükafat dialoq, tolerantlıq və qarşılıqlı hörmət ideyalarını təcəssüm etdirir. O bildirib ki, Azərbaycan bu dəyərlərə hər zaman sadiq olub və beynəlxalq münasibətlərdə əməkdaşlıq, qarşılıqlı anlaşma və sülh prinsiplərini əsas götürür.

Çıxışın sonunda dövlət başçısı vurğulayıb ki, regionda yeni reallıqlar yaranıb və bu reallıqlar əməkdaşlıq, inkişaf və birgəyaşayış üçün geniş imkanlar açır. Azərbaycan gələcəkdə də sülhün möhkəmləndirilməsi və insan qardaşlığı ideyalarının təşviqi istiqamətində öz səylərini davam etdirəcək.

Həcərxanım Nəzərova,

YAP fəalı, Hacıqabul rayon Heydər Əliyev Mərkəzinin əməkdaşı.