Enerji təhlükəsizliyi məsələsi bu gün qlobal siyasətin və iqtisadi münasibətlərin ən mühüm istiqamətlərindən birinə çevrilib. Dünya enerji bazarlarında baş verən dəyişikliklər, geosiyasi gərginliklər və yeni iqtisadi reallıqlar dövlətlərin enerji strategiyalarını daha çevik və dayanıqlı şəkildə formalaşdırmasını zəruri edir. Məhz belə bir şəraitdə Azərbaycanın həyata keçirdiyi enerji siyasətinin əsas istiqamətlərindən biri qaz təchizatının şaxələndirilməsi və enerji bazarlarında etibarlı tərəfdaş kimi mövqeyinin möhkəmləndirilməsidir.

Bu məsələ Prezident İlham Əliyevin iştirakı ilə keçirilən Cənub Qaz Dəhlizi Məşvərət Şurası çərçivəsində nazirlərin 12-ci və Yaşıl Enerji Məşvərət Şurası çərçivəsində nazirlərin 4-cü iclasında da xüsusi olaraq vurğulanıb. Dövlət başçısı çıxışında qeyd edib ki, Azərbaycanın enerji strategiyası təkcə mövcud resursların ixracını deyil, eyni zamanda qaz təchizatının şaxələndirilməsini və tərəfdaş ölkələrlə əməkdaşlığın genişləndirilməsini nəzərdə tutur. Bu yanaşma Azərbaycanın enerji siyasətinin uzunmüddətli və strateji xarakter daşıdığını göstərir.

Son illərdə Azərbaycanın qaz ixrac coğrafiyası əhəmiyyətli dərəcədə genişlənib. Əgər əvvəlki dövrlərdə Azərbaycan qazı əsasən region ölkələrinə ixrac edilirdisə, bu gün Avropanın bir sıra dövlətləri də Azərbaycan qazını etibarlı enerji mənbəyi kimi qəbul edir. Bu isə Azərbaycanın enerji diplomatiyasının uğurunun bariz göstəricisidir. Xüsusilə Avropa ölkələrinin enerji təhlükəsizliyinin təmin olunmasında Azərbaycanın rolu getdikcə daha da artır.

Qaz təchizatının şaxələndirilməsi yalnız ixrac marşrutlarının artırılması ilə məhdudlaşmır. Bu strategiya eyni zamanda yeni bazarların formalaşdırılması, mövcud enerji infrastrukturunun genişləndirilməsi və tərəfdaş ölkələrlə uzunmüddətli müqavilələrin bağlanmasını da əhatə edir. Azərbaycan bu istiqamətdə ardıcıl və düşünülmüş siyasət həyata keçirir. Dövlətimizin təşəbbüsü ilə reallaşdırılan böyük enerji layihələri məhz bu məqsədə xidmət edir.

Prezident İlham Əliyev çıxışında Azərbaycanın enerji sahəsində etibarlı tərəfdaş olduğunu bir daha vurğulayaraq qeyd edib ki, ölkəmiz imzaladığı bütün müqavilələrə sadiq qalır və tərəfdaş dövlətlərin enerji təhlükəsizliyinə töhfə verməyə davam edir. Bu yanaşma Azərbaycanın beynəlxalq enerji bazarında nüfuzunu daha da gücləndirir və ölkəmizə olan etimadı artırır.

Azərbaycanın həyata keçirdiyi enerji siyasəti təkcə iqtisadi deyil, həm də siyasi və strateji əhəmiyyət daşıyır. Enerji layihələri müxtəlif ölkələri və regionları birləşdirən əməkdaşlıq platformasına çevrilib. Bu baxımdan qaz təchizatının şaxələndirilməsi təşəbbüsü yalnız Azərbaycanın deyil, bütövlükdə regionun və Avropanın enerji təhlükəsizliyinə xidmət edən mühüm amildir.

Azərbaycanın həyata keçirdiyi enerji strategiyası ölkəmizin qlobal enerji sistemində rolunu daha da gücləndirir. Qaz təchizatının şaxələndirilməsi siyasəti isə Azərbaycanın uzunmüddətli enerji təhlükəsizliyinin təmin olunmasına və beynəlxalq əməkdaşlığın genişlənməsinə mühüm töhfə verir.

Gündüz Əsgərov,

YAP Neftçala rayon təşkilatı ərazi partiya təşkilatının sədri

Xol Qarabucaq kənd İƏD üzrə nümayəndə