Cənub Qaz Dəhlizi Məşvərət Şurası çərçivəsində nazirlərin 12-ci və Yaşıl Enerji Məşvərət Şurası çərçivəsində nazirlərin 4-cü iclası Azərbaycanın enerji siyasətində yeni dövrün əlamətlərini nümayiş etdirdi. Prezident İlham Əliyev çıxışında bərpa olunan enerji və yaşıl gündəliyin təkcə ekoloji məsuliyyət deyil, həm də strateji prioritet olduğunu vurğuladı.

Dövlət başçısı qeyd etdi: “Biz təkcə qaz və neft hasilatına əsaslanmırıq. Davamlı, təmiz və bərpa olunan enerji layihələrini də inkişaf etdiririk. Bu, Azərbaycanın enerji siyasətində yeni mərhələnin göstəricisidir və ölkəmizin enerji təhlükəsizliyini gücləndirir.”

Prezident İlham Əliyev konkret faktlara diqqət çəkdi: “Cari ilin yanvar ayında regionda indiyədək ən böyük külək elektrik stansiyasının – 240 meqavat gücündə obyektin açılışı olub. Layihə “ACWA Power” tərəfindən maliyyələşdirilib. 2023-cü ildə isə “Masdar” şirkəti 230 meqavat gücündə Günəş elektrik stansiyası inşa edib. Bir neçə layihə artıq icra mərhələsindədir və gələcək illərdə biz alternativ enerji mənbələri ilə işləyən yeni elektrik stansiyalarının açılışını gözləyirik.”

Prezident vurğuladı ki, bu təşəbbüslər yalnız enerji istehsalını artırmaqla kifayətlənmir, həm də Azərbaycanın beynəlxalq imicinə, iqtisadi rəqabətliliyinə və regional enerji təhlükəsizliyinə töhfə verir. “Burada xarici sərmayədarlar və yerli şirkətlər, o cümlədən SOCAR-ın iştirakı ilə müsbət kombinasiya mövcuddur. Alternativ enerji bazarında tələbat böyükdür və ölkəmiz bu imkanlardan səmərəli istifadə edir,” – deyə Prezident İlham Əliyev əlavə etdi.

Bununla yanaşı, dövlət başçısı enerji infrastrukturunun modernləşdirilməsi və regional əməkdaşlığın önəmini vurğuladı: “Artıq ötürücü xətlər mövcuddur, lakin daha çox ötürücü xətlər olacaq. Biz enerji kabelləri – Azərbaycandan Avropaya Qara dənizin dibi ilə gedən enerji kabeli və Mərkəzi Asiyadan Azərbaycana gələn enerji kabeli üzərində birlikdə işləməliyik. Hər iki layihə üzrə iş davam edir və iqtisadi-texniki əsaslandırmalar tamamlanmaq üzrədir.”

Prezidentin çıxışı Azərbaycanın enerji strategiyasında yaşıl gündəliyin yalnız ekoloji və texnoloji yenilik olmadığını, həm də milli enerji təhlükəsizliyi, regional inteqrasiya və qlobal enerji balansına töhfə kimi strateji əhəmiyyət daşıdığını göstərdi. Bu yanaşma ölkəmizi həm enerji istehsalında, həm də ixrac potensialında yeni mərhələyə daşıyır, regionda lider mövqeyini möhkəmləndirir və beynəlxalq əməkdaşlıq üçün geniş imkanlar açır.

Mübariz Tağıyev,

YAP Neftçala rayon təşkilatı ərazi partiya təşkilatının sədri

Astanlı kənd tam orta məktəbin direktoru