23 aprel 2026-cı il tarixində Gənclərin İnkişaf və Karyera Mərkəzinin Şirvan-Salyan regional nümayəndəliyinin Hacıqabul bölməsinin təşkilatçılığı və Hacıqabul rayon Təhsil Sektorunun tərəfdaşlığı ilə “LevelUP” Karyera Forumu keçirilib.

Forumun əsas məqsədi gənclərin karyera planlamasına dəstək olmaq, təhsil və peşə seçimi zamanı qarşılaşdıqları çətinliklər barədə onları maarifləndirmək və ixtisas seçimi prosesini asanlaşdırmaq olub.

Tədbirin açılış mərasimində çıxış edən Gənclərin İnkişaf və Karyera Mərkəzinin Şirvan-Salyan regional nümayəndəliyinin Hacıqabul bölməsinin rəhbəri Həbib İbrahimov qeyd edib ki, Ulu Öndər Heydər Əliyev tərəfindən əsası qoyulan dövlət gənclər siyasəti bu gün uğurla davam etdirilir və gənclərin hərtərəfli inkişafı daim diqqət mərkəzində saxlanılır.

Daha sonra Hacıqabul Rayon İcra Hakimiyyəti başçısının I müavini Saleh Ələsgərov rayonda gənclər sahəsində həyata keçirilən işlərdən bəhs edib. Yeni Azərbaycan Partiyası Hacıqabul rayon təşkilatının sədr müavini Hökmalı Mirzəyev rayonda gənclərin karyera planlamasına dəstək verən mövcud imkanları diqqətə çatdırıb. Hacıqabul rayon Gənclər və İdman Sektorunun müdiri Xalid Rəcəbli isə gənclər üçün yaradılan imkanlardan danışıb.

Forum “Gənclərin təhsil və peşəkar inkişaf imkanları” mövzusunda panel müzakirəsi ilə davam edib. Paneldə Hacıqabul rayon Təhsil Sektorunun müdiri Bəxtiyar Ələkbərov, Şirvan şəhər Gənclər Evinin direktoru Aytac Əliyeva və Hacıqabul rayon 1 nömrəli tam orta məktəbin direktoru Qəndab Nəsibova çıxış ediblər.

Çıxışlar zamanı gənclərin şəxsi inkişaf imkanları, təhsil və karyera planlamasında vacib amillər, düzgün ixtisas seçimi və rayonda bu sahədə mövcud inkişaf istiqamətləri barədə dəyərli fikirlər səsləndirilib.

Tədbir interaktiv müzakirələrlə davam edib, iştirakçıları maraqlandıran suallar cavablandırılıb və gənclərə faydalı tövsiyələr verilib.