Bakı Slavyan Universitetinin kollektivinə ağır itki üz vermişdir. BSU-nun inzibati-təsərrüfat işləri üzrə prorektoru, fəal ictimaiyyətçi, Yeni Azərbaycan Partiyasının üzvü  Əbilfəz İbrahim oğlu Nağıyev 26 avqust 2019-cu il tarixdə qəfil ürək  tutmasından vəfat etmişdir.

Ə.İ.Nağıyev 1960-cı il yanvarın 25-də Neftçala rayonunun Mirqurbanlı kəndində anadan olmuşdur. 1977-ci ildə Azərbaycan Dövlət Politexnik İnstitunun Radiotexnika mühəndisliyi fakültəsinə qəbul olunan Ə.İ.Nağıyev 1986-cı ildə həmin institutu əla qiymətlərlə bitirmişdir.

1978-1980-ci illərdə ordu sıralarında qulluq edən Əbilfəz Nağıyev  1977-ci ildən 1981-ci ilə qədər Bakı Termik İzolyasiya zavodunda fəhlə, Yeni Neftayırma zavodunun tikintisində mühəndis, 1981-ci ildən 1988-ci ilə qədər isə Milli Elmlər Akademiyasının Radiasiya Tədqiqatları İnstitunda elektron gücləndirici laboratoriyanın müdiri vəzifəsində çalışmışdır.

Ə.İ.Nağıyev 1988-ci ildə Azərbaycan Dövlət Pedoqoji Kollecində inzibati-təsərrüfat işləri üzrə direktor müavini işləməyə başlamış, 2016-cı ildən isə Bakı Slavyan Universitetində prorektor vəzifəsinə təyin edilmişdir.

Ə.İ.Nağıyevin əməyi rəsmi dövlət strukturları və çalışdığı kollektivi tərəfindən yüksək qiymətləndirilmişdir. Ə.İ.Nağıyev 1999-cu ildə Təhsil Nazirliyinin Qabaqcıl təhsil işçisi, 2009-cu ildə isə əlaçı təhsil işçisi  tərifnamələrinə layiq görülmüşdür. 2011-ci ildə Azərbaycan Respublikasının 20 illiyi münasibətilə “Tərəqqi” medalı ilə təltif olunmuş Ə.İ.Nağıyev Azərbaycan Dövlət Pedoqoji Kollecindəki fəaliyyətinə görə 2014-cü ildə Bakı şəhər İcra Hakimiyyəti tərəfindən mükafalandırılmışdır.

Ə.İ.Nağıyev  harada çalışıbsa özünü bacarıqlı və səriştəli mütəxəssis kimi göstərmişdir.  Ə.İ.Nağıyevin işıqlı xatirəsi onu tanıyanların qəlbində əbədi yaşayacaqdır. 

Bakı  Slavyan  Universitetinin kollektivi