Hər il 26 iyun tarixi Azərbaycan Respublikasında Silahlı Qüvvələr Günü kimi qeyd olunur. Bu əlamətdar tarix Azərbaycan dövlətinin suverenliyinin və ərazi bütövlüyünün təminatçısı olan rəşadətli Ordumuzun bayramıdır. Müstəqillik dövrünün ən böyük nailiyyətlərindən biri kimi qiymətləndirilən Azərbaycan Ordusu bu gün regionun ən güclü silahlı qüvvələrindən biridir.

Ulu Öndər Heydər Əliyev Azərbaycan Ordusunun formalaşmasında və inkişafında misilsiz xidmətlər göstərmişdir. Onun ordu quruculuğuna dair fikirləri bu gün də öz aktuallığını qoruyur:

“Ordu mövzusu, ordunun yaranması, formalaşması bizim bütün həyatımızda əsas mövzulardan biri olmalıdır… Xalqla ordunun birliyi həm xalqın qüdrətini, həm də ordunu daha da qüvvətli edir.” (02.02.1996)

1998-ci ildə Ümummilli Liderin imzaladığı sərəncamla 26 iyun – Azərbaycan Respublikasının Silahlı Qüvvələr Günü rəsmi dövlət bayramı kimi qeyd olunmağa başlandı. Bu gün Azərbaycanın hərbi qüdrəti ilə bağlı keçirilən tədbirlər, görüşlər, mükafatlandırmalar və paradlar xalqın orduya olan yüksək ehtiramını bir daha nümayiş etdirir.

Silahlı Qüvvələrin inkişafında əsas amillərdən biri peşəkar hərbi kadrların hazırlanmasıdır. Dövlət tərəfindən bu sahədə genişmiqyaslı tədbirlər görülür. 2024–2025-ci tədris ilindən başlayaraq ali və hərbi təhsil müəssisələrinə daxil olan kursantlara güzəştli ipoteka imkanları yaradılmışdır. Beş illik zabit və ya gizir xidməti şərti ilə dövlət həmin şəxslərə ipoteka məbləğinin 15%-dək hissəsini ödəyəcək.

Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə rəşadətli ordumuz 2020-ci ilin 44 günlük Vətən müharibəsində tarixi Qələbəyə imza atdı. Prezidentin 2021-ci il 26 iyun tarixində dediyi bu sözlər bu uğurun təməlini əks etdirir:

“Mən deyirdim ki, gün gələcək biz öz doğma torpağımıza qayıdacağıq, ərazi bütövlüyümüzü bərpa edəcəyik… Azərbaycan öz ərazi bütövlüyünü döyüş meydanında təmin etmişdir.”

Bu Qələbə təkcə ərazi bütövlüyümüzün bərpası deyil, həm də xalqımızın və Ordumuzun ruhunun, iradəsinin və birliyinin təntənəsi oldu. Qələbə Paradı və yaradılan Zəfər Muzeyləri bu ruhun daşıyıcılarıdır.

2023-cü ilin sentyabrında keçirilən birgünlük antiterror tədbiri nəticəsində Azərbaycanın konstitusion quruluşu bütün ölkə ərazisində bərpa edildi. Bu hadisə dövlətimizin gücünü, Ordumuzun peşəkarlığını bir daha sübut etdi.

Ordumuzun gücləndirilməsi məqsədilə müxtəlif ölkələrlə, o cümlədən qardaş Türkiyə ilə hərbi əməkdaşlıq daha da dərinləşdirilir. 2021-ci ildə imzalanan Şuşa Bəyannaməsi bu sahədə yeni mərhələnin əsasını qoydu. Bəyannamədə silah və sursatların təchizatı, istehsal sahələrinin yaradılması və birgə texnologiyaların inkişafı əks olunmuşdur.

Eyni zamanda, Azərbaycanın hərbi və diplomatik tərəfdaşlarından biri olan Pakistan İslam Respublikası ilə də əməkdaşlıq davam edir.

Azərbaycan əsgəri hər zaman vətənpərvərliyi, əzmi və şücaəti ilə seçilmişdir. Müharibələrdə göstərilən qəhrəmanlıq, şəhidlərimizin və qazilərimizin fədakarlığı bu günümüzü və gələcəyimizi təmin edən mənəvi dayaqlardır. Dövlət tərəfindən orden və medallarla təltif edilən hərbçilərimiz xalqımızın qürur mənbəyidir.

Prezident İlham Əliyevin dediyi kimi:

“Güclü dövlətin güclü ordusu olmalıdır… Biz müzəffər xalq, güclü dövlət, yenilməz ordu və güclü iradə sahibi kimi yaşayacağıq.

Yaşasın Azərbaycan Ordusu!

Yaşasın Müstəqil və Qalib Azərbaycan!

            Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.