2021-ci il iyunun 15-də Azərbaycan tarixində mühüm siyasi hadisələrdən biri baş verdi. Azərbaycanın mədəniyyət paytaxtı olan Şuşa şəhərində Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan tərəfindən “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” imzalandı. Bu tarixi sənəd iki qardaş ölkə arasında münasibətlərin ən yüksək səviyyəyə yüksəldiyini dünyaya nümayiş etdirdi.

Şuşa Bəyannaməsi dərin tarixi köklərə, xalqlarımızın əsrlər boyu davam edən dostluq və qardaşlıq münasibətlərinə əsaslanır. Bəyannamədə böyük liderlər Mustafa Kamal Atatürkün “Azərbaycanın sevinci sevincimiz, kədəri kədərimizdir” və Ulu Öndər Heydər Əliyevin “Bir millət, iki dövlət” kəlamlarının əks olunması Azərbaycan–Türkiyə qardaşlığının əbədi olduğunu bir daha təsdiq edir.

Prezident İlham Əliyevin qeyd etdiyi kimi, azad edilmiş Şuşada imzalanan bu sənəd əcdadlara sədaqətin, gələcək nəsillərə isə möhkəm birlik və həmrəylik irsinin ötürülməsinin göstəricisidir.

Bəyannamə siyasi, hərbi, iqtisadi, enerji, nəqliyyat, humanitar, təhsil, mədəniyyət və informasiya sahələri daxil olmaqla bütün istiqamətlərdə əməkdaşlığın daha da genişləndirilməsini nəzərdə tutur. Eyni zamanda tərəflərin beynəlxalq münasibətlərdə bir-birinin milli maraqlarını dəstəkləməsi, xarici siyasət məsələlərində qarşılıqlı məsləhətləşmələrin aparılması kimi mühüm müddəaları özündə əks etdirir.

Şuşa Bəyannaməsində 1921-ci il Qars müqaviləsinə istinad olunması da xüsusi rəmzi məna daşıyır. Yüz il sonra azad Şuşada imzalanan bu müttəfiqlik sənədi Azərbaycan–Türkiyə münasibətlərinin yeni dövrünü müəyyənləşdirərək gələcək əməkdaşlığın yol xəritəsinə çevrilmişdir.

Bu gün Şuşa Bəyannaməsi təkcə iki dövlət arasındakı münasibətlərin hüquqi əsası deyil, həm də türk dünyasında birlik, həmrəylik və qarşılıqlı dəstəyin mühüm nümunəsidir. Azərbaycan və Türkiyə arasındakı sarsılmaz dostluq əlaqələri gələcək nəsillər üçün də güclü bir qardaşlıq körpüsü olaraq yaşayacaqdır.

            Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.