Böyük şəxsiyyətlər zamanın hüdudlarına sığmır. Onların həyatı, fəaliyyəti və yaratdıqları irs yalnız yaşadıqları dövrə deyil, gələcək nəsillərin taleyinə də təsir göstərir. Azərbaycan xalqının Ümummilli Lideri Heydər Əliyev də məhz belə nadir tarixi şəxsiyyətlərdəndir. Onun dövlətçilik fəaliyyəti, xalqına və Vətəninə xidmət nümunəsi, müstəqil Azərbaycan uğrunda həyata keçirdiyi misilsiz xidmətlər xalqımızın milli yaddaşında silinməz iz qoymuşdur. Bu gün Ulu Öndərin əziz xatirəsinin böyük ehtiramla anılması təkcə keçmişə hörmət deyil, həm də onun ideyalarına, dövlətçilik irsinə və siyasi məktəbinə sədaqətin ifadəsidir.

Heydər Əliyevin Azərbaycan qarşısındakı xidmətləri müasir tariximizin ən şərəfli səhifələrini təşkil edir. Onun rəhbərliyi dövründə ölkəmiz sosial-iqtisadi, elmi-mədəni və ictimai həyatın müxtəlif sahələrində mühüm nailiyyətlər əldə etmiş, milli inkişaf üçün möhkəm əsaslar yaradılmışdır. Hələ sovet dövründə respublikaya rəhbərlik etdiyi illərdə həyata keçirilən məqsədyönlü siyasət nəticəsində Azərbaycan ittifaq miqyasında qabaqcıl mövqelərə yüksəlmiş, güclü kadr potensialı formalaşdırılmış, milli özünüdərk prosesinin dərinləşməsi üçün mühüm zəmin yaranmışdı.

Lakin Ulu Öndərin tarixi missiyasının ən mühüm mərhələsi müstəqillik dövrü ilə bağlıdır. 1990-cı illərin əvvəllərində Azərbaycan ağır siyasi və hərbi böhranla üzləşmişdi. Dövlət müstəqilliyi təhlükə altında idi, ölkədə anarxiya və xaos hökm sürürdü. Məhz belə bir dövrdə xalqın təkidli tələbi ilə Heydər Əliyevin hakimiyyətə qayıdışı Azərbaycan dövlətçiliyinin xilası ilə nəticələndi. 15 İyun 1993-cü il tarixindən başlayan Milli Qurtuluş yolu ölkəmizin gələcək inkişafının əsasını qoydu.

Ulu Öndər hakimiyyətə qayıtdıqdan sonra dövlətçiliyin möhkəmləndirilməsi, ictimai-siyasi sabitliyin təmin olunması, iqtisadi inkişaf strategiyasının hazırlanması və milli maraqlara əsaslanan xarici siyasətin formalaşdırılması istiqamətində mühüm addımlar atdı. Onun rəhbərliyi ilə həyata keçirilən islahatlar Azərbaycanın müstəqil dövlət kimi möhkəmlənməsinə və beynəlxalq aləmdə layiqli yer tutmasına imkan yaratdı.

Heydər Əliyevin dövlətçilik fəlsəfəsinin əsasını Azərbaycançılıq ideologiyası təşkil edirdi. O, milli birliyi dövlətin gücünün əsas mənbəyi hesab edir, xalqın vahid məqsəd ətrafında birləşməsini Azərbaycanın inkişafının başlıca şərti kimi qiymətləndirirdi. Bu ideologiya sonrakı dövrdə də ölkəmizin ictimai-siyasi həyatında mühüm rol oynadı və milli həmrəyliyin möhkəmlənməsinə xidmət etdi.

Ulu Öndər xalqına müraciətlərinin birində demişdi: “Mən həmişə fəxr etmişəm, bu gün də fəxr edirəm ki, mən azərbaycanlıyam”. Bu tarixi fikir təkcə milli mənsubiyyətə bağlılığın deyil, həm də Azərbaycan dövlətinə və xalqına sonsuz sevginin ifadəsi idi. Onun bütün fəaliyyəti məhz bu sevgi üzərində qurulmuşdu. Buna görə də Heydər Əliyev adı Azərbaycan xalqının yaddaşında yalnız böyük siyasətçi kimi deyil, həm də Vətəninə ürəkdən bağlı olan lider kimi yaşayır.

Bu gün Ulu Öndərin müəyyən etdiyi siyasi kurs Prezident İlham Əliyev tərəfindən uğurla davam etdirilir. Son illərdə Azərbaycanın əldə etdiyi böyük nailiyyətlər, xüsusilə Vətən müharibəsində qazanılan tarixi Zəfər, dövlət suverenliyinin tam bərpa olunması və işğaldan azad edilmiş ərazilərdə aparılan genişmiqyaslı quruculuq işləri Heydər Əliyev ideyalarının həyatiliyini və gücünü bir daha nümayiş etdirir. Müasir Azərbaycanın hər bir uğurunda Ulu Öndərin siyasi irsinin və dövlətçilik məktəbinin izlərini görmək mümkündür.

Heydər Əliyevin əziz xatirəsinin xalqımız tərəfindən böyük ehtiramla yad edilməsinin əsas səbəbi də məhz onun Azərbaycan dövlətinə və xalqına bəxş etdiyi misilsiz xidmətlərdir. Bu ehtiram illər keçdikcə daha da artır, yeni nəsillər Ulu Öndərin zəngin irsini öyrənir, onun ideyalarından ilham alırlar. Azərbaycanın müxtəlif bölgələrində keçirilən tədbirlər, elmi konfranslar, xatirə mərasimləri və digər təşəbbüslər xalqın öz böyük liderinə olan məhəbbətinin təzahürüdür.

Tarixi şəxsiyyətlər fiziki olaraq aramızdan ayrılsalar da, onların ideyaları və əməlləri yaşayır. Heydər Əliyev də məhz belə liderlərdəndir. Onun qurduğu müasir Azərbaycan dövləti, formalaşdırdığı dövlətçilik ənənələri və müəyyən etdiyi inkişaf yolu bu gün də ölkəmizin uğurlarına istiqamət verir. Güclü, qalib və tam suveren Azərbaycan Ulu Öndərin ölməz ideyalarının ən parlaq təcəssümüdür.

Bu gün Azərbaycan xalqı öz böyük oğlunun xatirəsini dərin ehtiramla anır və haqlı olaraq onunla fəxr edir. Çünki Heydər Əliyevin xalqı və dövləti qarşısındakı xidmətləri zaman keçdikcə daha aydın görünür, onun irsinin dəyəri daha dərindən dərk olunur. Ulu Öndərin əziz xatirəsi xalqımızın qəlbində yaşayır, yaşayacaq və gələcək nəsillər üçün daim örnək olacaqdır.

Pərviz Hacıyev,

YAP Neftçala rayon təşkilatı ərazi partiya təşkilatının sədri

Mirzəqurbanlı kənd ümumi orta məktəbin direktoru