İyulun 2-də Azərbaycan Respublikasının Prezidenti İlham Əliyev Özbəkistan Respublikasının Prezidenti Şavkat Mirziyoyevin ölkəmizə rəsmi səfəri çərçivəsində keçirilən mətbuat konfransında mühüm bəyanatla çıxış edib. Dövlət başçısı çıxışında Azərbaycan–Özbəkistan əlaqələrinin təkcə siyasi müstəvidə deyil, eyni zamanda dostluq və qardaşlıq üzərində qurulduğunu xüsusi vurğulayıb.

Prezident İlham Əliyev çıxışı zamanı Füzuli şəhərində Özbəkistanın maliyyə dəstəyi ilə inşa edilmiş məktəb layihəsini yüksək qiymətləndirib. “Bu, sadəcə bir təhsil müəssisəsi deyil, eyni zamanda bizim qardaşlığımızın rəmzidir. Bu təşəbbüs üçün Özbəkistan rəhbərliyinə və bütün xalqına xüsusi minnətdarlığımızı bildiririk,” – deyə dövlət başçısı vurğulayıb.

Mətbuat konfransında diqqət çəkən digər bir məqam isə işğaldan azad edilmiş ərazilərdə həyata keçiriləcək ikinci layihə ilə bağlı oldu. Prezident İlham Əliyev məlumat verdi ki, Özbəkistanın dəstəyi ilə bu dəfə Xankəndi şəhərində tikiş fabriki inşa ediləcək. Bu müəssisənin yaradılması bölgədə sosial rifahın yaxşılaşdırılması, yeni iş yerlərinin açılması baxımından olduqca əhəmiyyətlidir.

Səfər zamanı Azərbaycan və Özbəkistan arasında müxtəlif sahələri əhatə edən bir sıra mühüm sənədlər imzalanıb. Bu sənədlər nəqliyyatdan kənd təsərrüfatına, mədəniyyətdən sənayeyə qədər müxtəlif istiqamətlərdə əməkdaşlığı daha da dərinləşdirəcək.

Prezident İlham Əliyev çıxışında qeyd etdi ki, Azərbaycan ilə Özbəkistan arasında münasibətlər təkcə diplomatik çərçivələrlə məhdudlaşmır. “Biz eyni kökdən gələn, eyni dəyərləri bölüşən xalqlarıq. Bu gün imzalanan sənədlər, həyata keçirilən layihələr, aparılan siyasi dialoq – bütün bunlar bir amal uğrunda birləşməyimizin sübutudur,” – deyə Prezident qeyd edib.

Azərbaycan və Özbəkistan arasında ikitərəfli münasibətlər haqqında daha ətraflı məlumatla XİN-in rəsmi səhifəsində tanış olmaq mümkündür.

Prezident Şavkat Mirziyoyevin səfəri Azərbaycan–Özbəkistan münasibətlərində yeni mərhələnin başlanğıcı oldu. Qardaş ölkələrin birliyi təkcə bölgə üçün deyil, bütün türk dünyası üçün önəmli bir örnək kimi dəyərləndirilə bilər.

Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.