Azərbaycan tarixinin şanlı səhifələrindən biri də məhz Laçının işğaldan azad olunmasıdır. 2020-ci ilin 44 günlük Vətən müharibəsində əldə olunan Zəfər nəticəsində dövlətimizin ərazi bütövlüyü bərpa edildi, xalqımızın uzun illər həsrətlə gözlədiyi torpaqlarına qayıdış arzusu gerçəyə çevrildi. Bu gün Laçın özünün müasir inkişaf dövrünə qədəm qoyaraq yenidən doğma sakinlərini qucaqlayır.

Uzun illər işğal altında qalan Laçının azad olunması yalnız hərbi qələbə deyil, həm də tarixi ədalətin bərpası idi. Bu Zəfər Azərbaycan xalqının birliyini, ordumuzun gücünü və dövlət başçımız cənab İlham Əliyevin qətiyyətli liderliyini bütün dünyaya nümayiş etdirdi.

Laçının azadlığı uğrunda döyüşlərdə igidlik göstərmiş hərbçilərimiz dövlətimiz tərəfindən “Laçının azad olunmasına görə” medalı ilə təltif olunublar. Bu mükafat təkcə qəhrəmanlığa verilən qiymət deyil, həm də gələcək nəsillərə vətənpərvərlik örnəyidir.

Prezident İlham Əliyevin sözləri Laçının gələcək inkişaf yolunu aydın təsvir edir:

“Biz öz doğma torpaqlarımızı işğalçılardan azad edəndən sonra mən demişdim ki, Qarabağı və Şərqi Zəngəzuru cənnətə çevirəcəyik. Cənnətin əgər təsviri varsa, bu gün bax, budur. Gözəl təbiət, əzəmətli dağlar, gözəl binalar, evlər – hər şey çox böyük zövqlə yaradılır ki, həm insanlar burada rahat yaşasınlar, həm də Laçın şəhərinin müasir siması Azərbaycanın əldə etdiyi uğurları ilə eyni səviyyədə olsun.”

Laçının strateji mövqeyi bu bölgəni təkcə Azərbaycanın deyil, bütün regionun mühüm mərkəzinə çevirir. Burada həyata keçirilən infrastruktur layihələri, yeni nəqliyyat xətləri, enerji və sənaye müəssisələri Laçının beynəlxalq statusunu daha da gücləndirir.

Azad olunmuş Laçında bərpa və quruculuq işləri geniş vüsət alıb. Sənaye zonasında müxtəlif müəssisələrin yaradılması bölgənin iqtisadi inkişafına mühüm töhfə verir:

Mebel fabriki – illik 3 min kubmetr istehsal gücünə malikdir. Hazırda burada 54 nəfər çalışır, onların əksəriyyəti laçınlılardır.

Prefabrik modul evlərin istehsalı müəssisəsi – ildə 200 ev hazırlanır. Zəlzələyə davamlı, ekoloji təmiz və sərfəli olan bu evlərin istehsalı ilə 100 nəfər işlə təmin olunub.

Heyvandarlıq məntəqəsi – ildə 17 min baş heyvan kəsiminə imkan verir, burada 30 nəfərin daimi məşğulluğu nəzərdə tutulur.

Bu müəssisələr Laçının iqtisadi həyatını canlandırmaqla yanaşı, əhalinin sosial rifahının yaxşılaşdırılmasına da xidmət edir.

2023-cü ilin 28 may tarixindən etibarən laçınlıların doğma torpaqlara qayıdışı başlanıb. Sakinlərin evlərinə qayıtması Laçının həyatına yeni nəfəs verərək bölgədə sosial dirçəlişin əsasını qoyub.

İşğaldan azad olunmuş Zabux kəndi də sürətlə yenidən qurulur. Burada müasir yaşayış evləri, sosial obyektlər və infrastruktur layihələri icra olunaraq kənd sakinlərinə rahat həyat şəraiti yaradılır.

Dövlətimizin başçısı azad olunmuş Laçına dəfələrlə səfər edərək aparılan işlərə şəxsən nəzarət edib.

26 avqust – Laçın şəhəri günü Azərbaycan xalqının tarixi yaddaşında əbədi qalacaq bir gündür. Bu gün həm qəhrəmanlıq salnaməsi, həm də quruculuq və inkişafın rəmzidir. Laçın bu gün təkcə işğaldan azad olunmuş torpaq deyil, həm də yeni Azərbaycanın gücünü, qüdrətini və xalqımızın sarsılmaz iradəsini təcəssüm etdirən məkandır.

            Aytən İmanova,

            Hacıqabul rayon Heydər Əliyev Mərkəzinin direktoru, YAP fəalı.