Azərbaycan Respublikasının Prezidenti İlham Əliyev 21 avqust 2025-ci il tarixində Kəlbəcər şəhərinə səfər etmişdir. Dövlət başçısının çıxışı bir daha Azərbaycanın mövqeyinin beynəlxalq müstəvidə nə qədər güclü və prinsipial olduğunu göstərmişdir.

Prezident vurğulamışdır ki, Azərbaycan xalqı uzun illər davam edən ədalətsizliyə son qoyaraq, öz tarixi missiyasını yerinə yetirmiş, müstəqilliyini, ərazi bütövlüyünü və milli qürurunu bütün dünyaya nümayiş etdirmişdir.

Dövlət başçısı qeyd etmişdir ki, Azərbaycanın kifayət qədər güclü tərəfdaşları vardır və ölkəmizin beynəlxalq təşkilatlar çərçivəsində mövqeyi hər zaman ədalətli mövqe kimi qəbul olunur. Bu, həm siyasi, həm iqtisadi, həm də təhlükəsizlik baxımından mühüm üstünlüklər qazandırır.

Prezident İlham Əliyev bəyan etmişdir ki, dünya birliyi artıq Azərbaycanın Qələbəsini, yaratdığı yeni reallıqları qəbul edib. Bu, yalnız regional deyil, həm də qlobal miqyasda tarixi hadisədir.

Dövlət başçısı çıxışında Azərbaycanın güclü və ləyaqətli dövlət olduğunu vurğulamış, heç kimə məsləhət görmədiyini bildirmişdir ki, ölkəmizə qarşı hansısa bəd əməlləri düşünməsin. Azərbaycan regionda və beynəlxalq müstəvidə sülhün və təhlükəsizliyin təminatçısı kimi mühüm rol oynayır.

Prezident İlham Əliyevin Kəlbəcərə bu son səfəri bölgənin inkişafına verilən diqqətin davamı kimi qiymətləndirilir. Ölkə başçısı bundan əvvəl dəfələrlə Kəlbəcərə səfərlər etmişdir.

Bu səfərlər Prezidentin işğaldan azad olunmuş torpaqların bərpası, infrastrukturun yenidən qurulması və sosial-iqtisadi həyatın dirçəldilməsi istiqamətində apardığı siyasətin davamlı xarakter daşıdığını sübut edir.

Prezident İlham Əliyevin Kəlbəcər səfəri bir daha göstərdi ki, Azərbaycan yeni dövrə qədəm qoymuşdur – qalib, güclü, beynəlxalq aləmdə hörmət və etibar qazanmış dövlət kimi. Bu, xalqımızın həm tarixi Zəfərinin, həm də gələcək inkişaf yolunun bariz ifadəsidir.

         Aytən İmanova,

         Hacıqabul rayon Heydər Əliyev Mərkəzinin direktoru, YAP fəalı.