səviyyəli görüşü.

22 avqust 2025-ci il tarixində Türkmənistanın Avaza şəhərində Azərbaycan Respublikasının Prezidenti İlham Əliyev, Türkmənistan Milli Lideri Qurbanqulu Berdıməhəmmədov və Özbəkistan Respublikasının Prezidenti Şavkat Mirziyoyevin iştirakı ilə üçtərəfli Zirvə görüşü keçirilmişdir. Görüşün yekunlarına dair bəyanatla çıxış edən Prezident İlham Əliyev Azərbaycan, Türkmənistan və Özbəkistan arasında mövcud olan strateji tərəfdaşlıq münasibətlərinin yeni mərhələyə qədəm qoyduğunu vurğulamışdır.

Dövlət başçısı Avaza şəhərinə səfəri çərçivəsində Türkmənistanda müşahidə olunan sürətli inkişafı yüksək qiymətləndirmiş, ölkənin etibarlı əllərdə olduğunu bəyan etmişdir. Prezident İlham Əliyev qeyd etmişdir ki, Türkmənistanın Arxadağ şəhəri ilə Azərbaycanın Füzuli şəhərinin “qardaşlaşma” sənədinin imzalanması xalqlarımız arasında qardaşlıq münasibətlərinin rəmzidir.

Prezident bildirib ki, iki ölkə arasında mövqelər bütün əsas məsələlərdə üst-üstə düşür, bundan sonra da əməkdaşlıq həm ikitərəfli, həm də çoxtərəfli formatda uğurla inkişaf etdiriləcəkdir.

Prezident İlham Əliyev Türkmənistan tərəfindən Füzuli şəhərində məscid tikintisi təşəbbüsünün irəli sürüldüyünü və artıq layihənin hazırlandığını diqqətə çatdırmışdır. O, bu təşəbbüsü Azərbaycan–Türkmənistan qardaşlıq münasibətlərinin təzahürü kimi dəyərləndirmişdir.

Bəyanatında Azərbaycan Prezidenti Özbəkistanın Qarabağ bölgəsində həyata keçirdiyi sosial layihələrdən də bəhs etmişdir. O, Xankəndidə fəaliyyət göstərən tikiş fabrikində iki yüzdən çox insanın – əsasən qadınların – çalışdığını, müəssisənin yaxın gələcəkdə daha da genişləndiriləcəyini qeyd etmişdir.

Eyni zamanda, Füzuli şəhərində dahi özbək mütəfəkkiri Mirzə Uluqbəyin adını daşıyan 960 şagird yerlik orta məktəbin artıq fəaliyyət göstərdiyi vurğulanmışdır. Prezident İlham Əliyev bu layihələri Azərbaycan–Özbəkistan dostluq və qardaşlıq münasibətlərinin bariz nümunəsi adlandırmışdır.

Prezident İlham Əliyev çıxışında üç ölkə arasında yeni əməkdaşlıq platformasının yaradıldığını elan etmişdir. O, müvafiq dövlət qurumlarına nəqliyyat, tranzit, logistika, enerji, neft-qaz və mədəniyyət sahələri üzrə konkret təkliflərin hazırlanması ilə bağlı tapşırıqlar verildiyini qeyd etmişdir.

Dövlət başçısı Zirvə görüşünü tarixi hadisə kimi dəyərləndirərək, bu formatın regionda sülhə, sabitliyə və tərəfdaşlığa xidmət edəcəyinə əminliyini ifadə etmişdir.

Beləliklə, Avaza şəhərində keçirilən Zirvə görüşü Azərbaycan, Türkmənistan və Özbəkistan arasında çoxşaxəli əməkdaşlığın möhkəmləndirilməsi baxımından mühüm addım olmuşdur.

                        Aytən İmanova

                        Hacıqabul rayon Heydər Əliyev Mərkəzinin direktoru, YAP fəalı.