Azərbaycan xalqı üçün əlamətdar tarixlər sırasında xüsusi yer tutan günlərdən biri də 20 Sentyabr – Xankəndi, Xocalı, Xocavənd və Ağdərə şəhərləri günüdür. Prezident İlham Əliyevin 18 sentyabr 2024-cü il tarixli Sərəncamına əsasən, hər il bu gün Azərbaycan dövlətinin suverenliyinin tam təmin olunmasının rəmzi kimi təntənəli şəkildə qeyd edilir. Bu tarixin təsis olunması uzun və məşəqqətli 30 illik mübarizənin, minlərlə qəhrəman oğul və qızlarımızın canı və qanı bahasına əldə edilən Zəfərin nəticəsidir. Azərbaycan Ordusunun 2023-cü ilin 19–20 sentyabr tarixlərində həyata keçirdiyi uğurlu antiterror tədbirləri ilə separatçı silahlı dəstələrin tərk-silah edilməsi, dövlət suverenliyimizin bərpa olunması, Xankəndi, Xocalı, Xocavənd və Ağdərənin işğaldan tam azad edilməsi tarixi reallığa çevrildi.

Müzəffər Ali Baş Komandan İlham Əliyev 15 oktyabr 2023-cü ildə Xankəndi, Xocalı, Xocavənd və Ağdərə şəhərlərində Azərbaycanın Dövlət Bayrağını ucaltdı. Həmin gün tarixi nitqində dövlət başçısı bildirdi: “Bu gün tarixi bir gündür. Bu gün Xankəndi şəhərinin mərkəzi meydanında Azərbaycan Bayrağı qaldırıldı… Mən 20 il bundan əvvəl prezident seçilərkən xalqıma söz vermişdim ki, Azərbaycanın ərazi bütövlüyünü qoruyacağam. Şadam ki, bu gün bütün Azərbaycan xalqı ürəkdən sevinir, ‘Allaha şükür’ deyir. Biz bu müqəddəs anı 30 ildən çox gözləmişdik.” Bu bəyanat xalqımızın mübarizəsinin məntiqi sonunu, dövlət başçısının xalqa verdiyi tarixi vədin yerinə yetirilməsini təsdiqlədi.

8 noyabr 2023-cü ildə Xankəndidə keçirilmiş hərbi parad həm Zəfərin, həm də dövlətçilik iradəsinin təntənəsi oldu. Prezident İlham Əliyev çıxışında vurğuladı ki, üç il əvvəl Şuşanın azad olunması ilə düşmən təslim oldu, Azərbaycan Ordusu isə tarixə qızıl hərflərlə yazılan Qələbəni təmin etdi. Xankəndidə keçirilən bu parad Azərbaycanın hərbi-siyasi qüdrətinin, milli iradəsinin və qətiyyətli liderliyin bariz nümunəsi idi.

Xankəndidə yaradılan Qarabağ Universiteti dövlətimizin azad edilmiş ərazilərdə sosial-iqtisadi və humanitar inkişaf strategiyasının mühüm həlqəsidir. Prezident İlham Əliyevin 28 noyabr 2023-cü il tarixli Sərəncamı ilə təsis olunan bu ali təhsil müəssisəsi həm işğaldan azad edilən bölgənin bərpasında, həm də yüksək ixtisaslı kadrların hazırlanmasında mühüm rol oynayır.

Azərbaycan dövlətinin regionda idarəetməni səmərəli qurmaq istiqamətində atdığı mühüm addımlardan biri də Ağdərə rayonunun yaradılmasıdır. 5 dekabr 2023-cü il tarixli qanunla təsbit edilən bu qərar tarixi ədalətin bərpası ilə yanaşı, həmin bölgədə sosial-iqtisadi inkişafın təmin olunması baxımından mühüm əhəmiyyət kəsb edir.

21 dekabr 2023-cü ildə Ağdamın “Qarabağ” futbol komandası uzun illərdən sonra Xankəndidə ilk rəsmi oyuna çıxdı. Prezident İlham Əliyevin də izlədiyi bu görüş Qarabağın mərkəzində milli birliyin, idman ənənələrinin və dövlətçilik rəmzlərinin qayıdışını təsdiqlədi.

Xankəndi, Xocalı, Xocavənd və Ağdərə azad olunduqdan sonra Prezident İlham Əliyevin bölgələrə çoxsaylı səfərləri, infrastruktur layihələrinin təməlqoyma və açılış mərasimləri, təhsil, mədəniyyət, sosial və iqtisadi sahələrdə atılan addımlar Azərbaycanın bu torpaqlarda həyatın yenidən qurulması istiqamətində qətiyyətli iradəsini nümayiş etdirir. Dövlət Bayrağının ucaldılması, hərbi paradların keçirilməsi, Qarabağ Universitetinin fəaliyyətə başlaması, yeni yolların, məktəblərin, yaşayış məhəllələrinin və müəssisələrin istifadəyə verilməsi bu torpaqların Azərbaycan həyatına qəti və əbədi dönüşünün rəmzidir.

20 Sentyabr – Xankəndi, Xocalı, Xocavənd və Ağdərə şəhərləri günü xalqımızın mübarizə iradəsini, dövlətimizin siyasi və hərbi qüdrətini, müasir tariximizin ən parlaq səhifəsini təcəssüm etdirir. Bu gün həm də şəhidlərimizin müqəddəs xatirəsinə ehtiramın, qəhrəmanlıq salnaməsinin davamının, qalib Azərbaycanın əbədi Zəfər yolunun təntənəsidir.

            İsmayıl İbrahimov,

            YAP Hacıqabul rayon təşkilatının sədri.