Azərbaycanın müasir dövlətçilik tarixində 3 oktyabr 1993-cü il xüsusi əhəmiyyət kəsb edir. Həmin gün ümummilli lider Heydər Əliyev Azərbaycan Respublikasının Prezidenti seçildi. Bu tarixi hadisə dövlətçiliyimizin qorunub saxlanılması, müstəqilliyimizin əbədi olması və xalqımızın gələcək inkişaf yolunun müəyyənləşdirilməsi baxımından mühüm dönüş nöqtəsi oldu.

Prezident seçildikdən sonra Heydər Əliyev Azərbaycanın dövlət müstəqilliyini qorumağı, onun dönməzliyini təmin etməyi başlıca vəzifə kimi müəyyənləşdirdi:

“Azərbaycanın dövlət müstəqilliyi əbədidir, dönməzdir və bizim qarşımızda duran vəzifə dövlət müstəqilliyini qorumaqdan, əbədi etməkdən ibarətdir.”

Ulu Öndərin qətiyyətli siyasəti nəticəsində cinayətkarlıq və hüquq pozuntularına qarşı barışmaz mübarizə aparıldı, ölkədə sabitlik və təhlükəsizlik bərpa olundu. Bu, əsaslı dəyişikliklərə və dövlət quruculuğu prosesinin möhkəmlənməsinə yol açdı.

Heydər Əliyev Azərbaycanın müstəqil dövlət kimi beynəlxalq aləmdə layiqli yer tutmasını təmin etdi. O, beynəlxalq əməkdaşlıq əlaqələrinin inkişafına və ölkəmizin dünya birliyinə inteqrasiyasına nail oldu. Xarici siyasət kursu uğurlu və ardıcıl şəkildə həyata keçirildi, Azərbaycan həqiqətlərinin dünya ictimaiyyətinə çatdırılması əsas istiqamətlərdən biri oldu.

Ümummilli Lider dəfələrlə vurğulayıb ki, müstəqillik hər bir azərbaycanlı üçün ən müqəddəs məqsəd və ali vəzifədir. Onun sözləri ilə desək:

“Bizim, Azərbaycan dövlətinin çox gözəl gələcəyi var. Biz bu gələcəyi müstəqillik yolunda görürük. Azərbaycan üçün dövlət müstəqilliyi tarixi nailiyyətdir, ən böyük sərvətdir.”

Heydər Əliyevin rəhbərliyi ilə Azərbaycan yalnız dövlət müstəqilliyini möhkəmləndirmədi, həm də sülhsevər siyasət yürüdərək bölgədə sabitliyin və əməkdaşlığın təşviqinə çalışdı:

“Azərbaycan sülhpərvər ölkədir. Biz dünyada sülh istəyirik, Qafqazda sülh istəyirik, bölgəmizdə sülh istəyirik, ölkəmizdə sülh istəyirik və buna nail olmağa çalışırıq."

3 oktyabr 1993-cü ildə Heydər Əliyevin Azərbaycan Respublikasının Prezidenti seçilməsi müstəqil dövlətimizin tarixi inkişaf yolunun ən mühüm mərhələlərindən biri oldu.

            Aytən İmanova,

            Hacıqabul rayon Heydər Əliyev Mərkəzinin direktoru, YAP fəalı.