Artıq 32 il geridə qalıb. 1993-cü ilin 3 oktyabrı Azərbaycan tarixində bir dönüş nöqtəsi, bir xilaskar gün kimi qalıb. O illərdə dövlət müstəqilliyimiz yenicə qazanılmışdı, lakin ölkə ağır fəlakətlər burulğanına düşmüşdü. Siyasi böhran, hakimiyyət uğrunda mübarizə, parçalanma təhlükəsi, iqtisadi iflic, vətəndaş qarşıdurmaları… Ermənistanın hərbi təcavüzü nəticəsində torpaqlarımız işğal edilir, minlərlə insan yurd-yuvasından didərgin düşürdü. Dövlət idarəçiliyi iflic vəziyyətində idi, xalq ümidini itirmək ərəfəsində idi. Azərbaycan sanki məhv olmaq təhlükəsi qarşısında idi.

Məhz belə bir anda xalqın nicatı bir şəxsiyyətdə – Heydər Əliyevdə idi. Xalqın təkidli çağırışı ilə o, 1993-cü ilin iyununda Bakıya qayıtdı və dövlət idarəçiliyində məsuliyyət yükünü üzərinə götürdü. Xalqın sarsılmaz iradəsi və etimadı nəticəsində 3 oktyabr 1993-cü ildə ümumxalq seçkilərində Heydər Əliyev Azərbaycan Respublikasının Prezidenti seçildi. Bu, sadəcə bir seçki deyildi – Azərbaycanın dövlət kimi yaşaması və gələcəyə inamla baxması üçün tarixi dönüş anı idi.

Heydər Əliyev o günlərdə söylədiyi sözlərlə xalqın yaddaşına əbədi həkk olundu:

“Mənim həyatım da, fəaliyyətim də yalnız və yalnız doğma Azərbaycana xidmətə həsr olunub.”

Ulu Öndərin hakimiyyətə gəlişi ilə ilk növbədə ölkədə siyasi sabitlik yaradıldı. Vətəndaş müharibəsi təhlükəsi aradan qaldırıldı, dövlət çevrilişi cəhdləri zərərsizləşdirildi, hüquq-mühafizə orqanları gücləndirildi, milli ordunun qurulmasına başlanıldı. Azərbaycan dövlətçiliyinin sütunları möhkəmləndi, xalq öz gələcəyinə inanmağa başladı.

1994-cü ilin payızında imzalanan “Əsrin müqaviləsi” ölkəmizin iqtisadi inkişafında tamamilə yeni mərhələ açdı. Heydər Əliyevin uzaqgörən neft strategiyası Azərbaycanın gələcək iqtisadi müstəqilliyini təmin etdi. Onun məşhur kəlamı bu gün də aktuallığını qoruyur:

“Azərbaycanın dövlət müstəqilliyini əbədi, dönməz etmək üçün biz güclü iqtisadi dayaqlara malik olmalıyıq.”

Heydər Əliyevin hakimiyyəti dövründə Azərbaycan beynəlxalq aləmdə mövqeyini möhkəmləndirdi. Geniş diplomatik əlaqələr quruldu, ölkəmiz dünya miqyasında etibarlı tərəfdaş kimi qəbul olunmağa başladı. Onun balanslaşdırılmış xarici siyasəti sayəsində Azərbaycan regionda sülhün, əməkdaşlığın və sabitliyin əsas dayaqlarından biri oldu.

Heydər Əliyevin hakimiyyətə gəlişi həm də milli-mənəvi dirçəlişin başlanğıcı idi. O, Azərbaycançılıq ideologiyasını dövlət siyasətinin əsas prinsipi səviyyəsinə yüksəltdi. Xalqı vahid amal ətrafında topladı, milli birliyi və həmrəyliyi möhkəmləndirdi.

Onun ən çox yad edilən sözlərindən biri də budur:

“Mən həmişə fəxr etmişəm, bu gün də fəxr edirəm ki, mən azərbaycanlıyam!”

Bu sözlər təkcə bir liderin şəxsi qüruru deyildi, həm də bütün millətə ünvanlanan böyük bir çağırış idi.

3 oktyabr 1993-cü il Azərbaycan tarixində sadəcə bir siyasi qələbə deyil, dövlətimizin və xalqımızın xilası idi. O gün Heydər Əliyevin hakimiyyətə qayıdışı ilə Azərbaycan parçalanmaqdan xilas oldu, sabitlik və inkişaf yoluna çıxdı, güclü dövlətçiliyin təməli qoyuldu.

Bu gün Azərbaycan möhkəm dövlətçilik ənənələri, beynəlxalq nüfuzu və qalib ordusu ilə tarix yazırsa, bunun başlanğıcı məhz 1993-cü ilin 3 oktyabrından keçir.

            İsmayıl Salmanov,

            YAP Hacıqabul rayon təşkilatının məsləhətçisi.