Azərbaycan tarixinin ən parlaq səhifələrindən biri – Cəbrayılın azad olunduğu gün 4 oktyabr 2020-ci il, xalqımızın yaddaşına Zəfər salnaməsinin şanlı səhifəsi kimi həkk olunub. Müzəffər Ali Baş Komandan, Prezident İlham Əliyevin rəhbərliyi ilə Rəşadətli Azərbaycan Ordusunun qəhrəmanlığı nəticəsində 27 ildən sonra doğma Cəbrayıl torpağı düşmən işğalından azad edildi. Bu hadisə təkcə bir şəhərin deyil, bütövlükdə Vətən torpaqlarının azadlığına gedən yolun başlanğıcı idi.

Bu gün Cəbrayıl rayonunda genişmiqyaslı bərpa və quruculuq işləri həyata keçirilir. Azad olunmuş ərazilərdə yollar, körpülər, enerji və su xətləri, sosial və mədəni obyektlər inşa olunur. Cəbrayıl şəhəri müasir memarlıq üslubunda yenidən qurulur, regionun iqtisadi, sosial və turizm mərkəzinə çevrilir.

Cəbrayılın azadlığı 30 ildən artıq həsrətin, doğma torpaqlara qayıdış arzusunun gerçəkləşməsi idi. Bu gün o torpaqlarda həyat yenidən canlanır, doğma yurduna dönmək həsrətində olan cəbrayıllılar üçün yeni ümidlər doğurur. Cəbrayılın hər qarışı şəhid qanı ilə suvarılıb və bu torpağın hər daşı mübarizənin, qəhrəmanlığın rəmzidir.

Cəbrayıl şəhəri günü həm də Vətən müharibəsində əldə edilən Böyük Qələbənin rəmzlərindən biridir. Bu gün Cəbrayıl azadlığın, dövlətimizin gücünün və xalqın birliyinin təcəssümünə çevrilib. Qələbənin xatirəsinə abidələr, memorial komplekslər, parklar və mədəniyyət ocaqları inşa edilir ki, gələcək nəsillər qəhrəmanlıq tariximizi qürurla yaşatsınlar.

Prezident İlham Əliyevin göstərişi ilə hazırlanan “Cəbrayıl şəhərinin 2040-cı ilədək inkişafına dair Baş plan” rayonun gələcək inkişaf istiqamətlərini müəyyənləşdirir. Plan çərçivəsində yaşayış məhəllələri, sosial obyektlər, sənaye və kənd təsərrüfatı sahələri üçün müasir infrastruktur qurulur. Bu plan Cəbrayılı gələcəyin müasir, ağıllı və ekoloji cəhətdən dayanıqlı şəhərlərindən birinə çevirməyi hədəfləyir.

Uzun illər işğal altında qalan Maşanlı kəndində artıq həyat qaynayır. Yeni evlər, məktəblər, sosial obyektlər və yollar salınır. Kəndin bərpası həm qayıdışın, həm də dövlətin bölgələrə göstərdiyi diqqətin bariz nümunəsidir.

Dövlət başçısının Cəbrayıla səfərləri bu torpaqlara olan qayğının və diqqətin ən real göstəricisidir.

28 sentyabr 2023-cü ildə Prezident İlham Əliyev Cəbrayıl şəhərində inzibati binanın təməlqoyma mərasimində, Mənzil İnşaatı Dövlət Agentliyi tərəfindən inşa edilən ilk yaşayış məhəlləsində və “Azərişıq” ASC-nin Cəbrayıl Rəqəmsal İdarəetmə Mərkəzinin açılışında iştirak etmişdir.

18 may 2024-cü ildə isə dövlət başçısı Cəbrayıl rayonunun Böyük Mərcanlı, Karxulu, Sarıcallı və Maşanlı kəndlərinin təməlini qoymuşdur. Bu səfərlər işğaldan azad edilmiş torpaqların yenidən dirçəlməsinin davamlı və məqsədyönlü siyasətin tərkib hissəsi olduğunu sübut edir.

Cəbrayıl bu gün Zəfərin, yenidənqurmanın və milli qürurun simvoludur. Azərbaycan xalqı əmindir ki, Prezident İlham Əliyevin rəhbərliyi ilə Cəbrayıl qısa zamanda Qarabağın ən müasir və abad rayonlarından birinə çevriləcək.

4 oktyabr – Cəbrayıl şəhəri günü isə hər il qürurla qeyd ediləcək və xalqımızın birliyi, mübarizliyi və yenilməzliyinin təntənəsinə çevriləcək.

            Aytən İmanova,

            Hacıqabul rayon Heydər Əliyev Mərkəzinin direktoru, YAP fəalı.