Azərbaycanın cənub-qərb bölgəsində yerləşən qədim Füzuli torpağı tarix boyu zəngin mədəni irsi, qədim abidələri, igid oğulları və təbiətinin füsunkar gözəlliyi ilə seçilmişdir. Bu şəhər təkcə tarixin deyil, həm də qəhrəmanlığın və yenidənqurmanın simvoluna çevrilib.

Füzuli rayonu qədim sivilizasiyaların izlərini daşıyan torpaqdır. Burada yerləşən Qarğabazar karvansarası, Məscidlər, Pirlər, Ziyarətgahlar Azərbaycan xalqının tarixində mühüm yer tutur. Bu abidələr Füzulinin həm dini, həm də mədəni kimliyinin ayrılmaz hissəsidir.

27 il işğal altında qalan Füzuli torpaqları 2020-ci ilin oktyabrında Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu tərəfindən azad olundu. Füzulinin azad edilməsi Qələbə salnaməmizin ən şanlı səhifələrindən biri kimi tarixə yazıldı.

Azadlıqdan dərhal sonra Füzuli rayonunda genişmiqyaslı bərpa və tikinti işlərinə başlanıldı. Prezident İlham Əliyevin tapşırığına əsasən, infrastrukturun bərpası, yolların çəkilməsi, yaşayış məhəllələrinin salınması, məktəblərin, uşaq bağçalarının, mədəniyyət və idman obyektlərinin tikintisi həyata keçirilir.

Bu məqsədlə Füzuli Beynəlxalq Hava Limanı qısa müddətdə istifadəyə verildi və bu, Qarabağın inkişafına açılan hava qapısı oldu.

Müasir Füzuli artıq yenidən doğulur. Prezident İlham Əliyevin 2023 və 2024-cü illərdə rayona çoxsaylı səfərləri bu inkişafın canlı sübutudur:

05 may 2023-cü ildə Pirəhmədli və Dədəli kəndlərinin, eləcə də Füzuli yaşayış kompleksinin təməlləri qoyulub, daxili yol-küçə şəbəkəsi və “Azərişıq”ın Rəqəmsal Yarımstansiyası istifadəyə verilib.

23 avqust 2023-cü ildə Özbəkistan Prezidenti Şavkat Mirziyoyevlə birlikdə Mirzə Uluqbəy adına 1 nömrəli tam orta məktəbin açılışı həyata keçirilib.

16 oktyabr 2023-cü ildə Füzulidə bir sıra kəndlərin, idman kompleksi və yaşayış massivlərinin təməlqoyma mərasimləri keçirilib.

17 oktyabr 2023-cü ildə – Füzuli Şəhəri Günündə sakinlərin şəhərə köçü başlanılıb.

12 mart 2024-cü ildə isə Qazaxıstan Prezidenti Kasım-Jomart Tokayevlə birgə Kurmanqazı adına Uşaq Yaradıcılıq Mərkəzinin açılışı baş tutub.

Bu gün Füzuli təkcə bir şəhər deyil – bu, xalqımızın iradəsinin, birliyinin və dövlətin gücünün təcəssümüdür. Burada həyat yenidən başlayır, uşaq səsi, məktəb zəngi, tikinti səsləri bu torpağın bərpasının musiqisinə çevrilib.

17 oktyabr – Füzuli şəhərinin günü, azadlığın, qürurun və gələcəyə inamın bayramıdır.

Füzuli yenidən doğulub – bu dəfə əbədi!

Aytən İmanova,

YAP fəalı, Hacıqabul rayon Heydər Əliyev Mərkəzinin direktoru.