Azərbaycan tarixinin ən ağrılı səhifələrindən biri Füzuli şəhərinin işğalı olmuşdusa, ən parlaq səhifələrindən biri də onun azadlığıdır. 17 oktyabr – Füzuli şəhərinin düşmən işğalından azad olunduğu gün təkcə bir şəhərin deyil, bütöv bir xalqın qürurunun, dirənişinin və ədalətinin təntənəsi kimi yaddaşlara həkk olunub. Bu tarix Azərbaycan xalqının milli birliyinin, dövlətimizin gücünün və Ali Baş Komandan İlham Əliyevin müdrik, qətiyyətli siyasətinin bariz simvoludur.

Füzuli işğal illərində viran qoyulmuş, talan edilmiş, lakin ruhən əsla sarsılmamış bir şəhər idi. 2020-ci ilin həmin möhtəşəm oktyabr günündə, Azərbaycan Ordusunun şanlı Zəfəri ilə bu qədim diyar azad olundu və xalqın illərlə gözlədiyi sevinc reallığa çevrildi. Bu gün Füzuli yalnız azad edilmiş torpaq deyil, həm də yenidənqurulan, dirçələn, müasir memarlığı, geniş yolları, hava limanı və abadlaşan kəndləri ilə Azərbaycanın inkişaf və bərpa qüdrətini nümayiş etdirən bir simvoldur.

Füzulinin azadlığı ilə başlayan o möhtəşəm dönüş bu torpaqlarda həyatın yenidən cücərməsi, insanın doğma yurduna qayıdış ümidinin rəmzi oldu. 17 oktyabr artıq yalnız bir tarix deyil – o, hər azərbaycanlının qəlbində yaşanan Zəfər hissinin, xalqın iradə və birliyinin təcəssümüdür. Bugün Füzuli hər daşında qəhrəmanlıq, hər küçəsində yenidənqurma nəfəsi daşıyan şəhər kimi dirçəlir – Vətən torpağının əbədi azadlığının canlı sübutu kimi.

Sahib Aslanov,

YAP fəalı, Hacıqabul rayon Ağsaqqallar Şurasının sədri.