Azərbaycan Respublikasının Prezidenti İlham Əliyevin 18 oktyabr 2025-ci ildə Qazaxıstanın “Kazinform” agentliyinə verdiyi müsahibə qardaş ölkələrimiz arasında münasibətlərin yüksək səviyyəsini bir daha nümayiş etdirdi. Dövlətimizin başçısı vurğuladı ki, Azərbaycan və Qazaxıstan tarixi köklər, ortaq türk kimliyi, dostluq və qarşılıqlı etimad üzərində qurulan münasibətlərini bu gün sarsılmaz müttəfiqliyə çevirib.

Prezident İlham Əliyev bildirib ki, son illər həyata keçirilən fəal siyasi dialoq, dövlət başçılarının müntəzəm görüşləri və imzalanmış sənədlər münasibətlərimizi strateji tərəfdaşlığın ən yüksək mərhələsinə yüksəldib. Xüsusilə, iqtisadi-ticari əməkdaşlıq, Orta Dəhliz, enerji və logistika layihələri ikitərəfli əlaqələrin inkişafında mühüm rol oynayır. 2025-ci ilə qədər ticarət dövriyyəsinin kəskin artımı, nəqliyyat marşrutlarının genişlənməsi və birgə tranzit imkanları bunun bariz nümunəsidir.

Müsahibədə, həmçinin Füzuli şəhərində Qazaxıstan tərəfindən inşa olunan Kurmanqazı adına Uşaq İncəsənət Mərkəzinin mədəni əməkdaşlığın canlı rəmzinə çevrildiyi vurğulandı. Mədəni, humanitar və təhsil layihələri xalqlarımızı daha da yaxınlaşdırır.

Prezident İlham Əliyev Türk Dövlətləri Təşkilatının türk dünyasının siyasi və mənəvi birliyinin möhkəmlənməsində aparıcı rolunu xüsusi qeyd etdi. Bugünkü reallıq göstərir ki, Azərbaycan və Qazaxıstan təkcə regionda deyil, Avrasiyada birlik, əməkdaşlıq və inteqrasiyanın lokomotividir.

Dövlət başçısı Xəzər dənizinin ekoloji təhlükələrlə üzləşdiyini də diqqətə çatdırdı və bu istiqamətdə bütün Xəzəryanı ölkələrin birgə fəaliyyət göstərməsinin vacibliyini vurğuladı.

Bu müsahibə Azərbaycanın qardaş Qazaxıstanla münasibətlərə verdiyi strateji önəmi, türk dünyasına sadiqliyini, regional əməkdaşlığa baxışını və gələcəyə yönəlik aydın vizyonunu nümayiş etdirir.

Birliyimiz gücümüzdür!

Türk dünyası — ortaq evimizdir!

         Aytən İmanova,

         YAP fəalı, Hacıqabul rayon Heydər Əliyev Mərkəzinin direktoru.