2025-ci il oktyabrın 21-də Prezident İlham Əliyev Qazaxıstana rəsmi səfəri çərçivəsində Astanada mətbuata bəyanat verdi və Azərbaycan-Qazaxıstan Ali Dövlətlərarası Şurasının ikinci iclasında çıxış etdi. Bu görüşlər bir daha göstərdi ki, Azərbaycanla Qazaxıstanı birləşdirən münasibətlər təkcə dostluq və qardaşlıq deyil, həm də strateji tərəfdaşlıq üzərində qurulmuş dərin bir əməkdaşlıq modelidir.

Prezident İlham Əliyev çıxışında qeyd etdi ki, Qazaxıstan Azərbaycanın ərazi bütövlüyünü və suverenliyini daim dəstəkləyib. “Bizim torpaqlarımız işğal altında olarkən Qazaxıstan həm ikitərəfli formatda, həm beynəlxalq təşkilatlar çərçivəsində daim Azərbaycanın suverenliyini müdafiə edirdi. Biz bu qardaş dəstəyi hər zaman hiss etmişik və minnətdarıq,” – deyə Prezident vurğuladı. Bu fikirlər iki xalq arasında tarixən formalaşmış etimada və qarşılıqlı hörmətə söykənən münasibətlərin aydın göstəricisidir.

İclasda tərəflər iqtisadi, enerji, nəqliyyat, sənaye, rəqəmsal texnologiyalar və mədəniyyət sahələrində əməkdaşlığın daha da genişləndirilməsi istiqamətində konkret addımlar barədə razılığa gəldilər. Prezident İlham Əliyev xüsusilə “Orta Dəhliz” adlanan nəqliyyat-logistika layihəsinin önəmini vurğulayaraq bildirdi ki, Azərbaycan və Qazaxıstan bu dəhlizin inkişafında birgə maraqlıdırlar və bu, təkcə iki ölkə üçün deyil, bütövlükdə region üçün yeni imkanlar açır.

Prezidentin sözlərinə görə, Azərbaycan ilə Qazaxıstan arasında ticarət dövriyyəsinin artması, birgə sənaye müəssisələrinin yaradılması, liman və tranzit infrastrukturlarının inteqrasiyası iki ölkənin strateji tərəfdaşlığını daha da gücləndirəcək. Görüşdə həmçinin enerji sahəsində əməkdaşlığın genişləndirilməsi, qaz, neft və bərpa olunan enerji layihələri üzrə birgə təşəbbüslərin həyata keçirilməsi müzakirə olundu.

Prezident İlham Əliyev çıxışında bölgədə sülhün və sabitliyin bərqərar olunmasının vacibliyinə də toxundu. O qeyd etdi ki, Cənubi Qafqazda yeni reallıqlar yaranıb və artıq sülh dövrü başlanır: “Yeni mərhələ – hətta demək olar ki, artıq başlamışdır – Azərbaycanla Ermənistan arasında sülh dövrüdür. Biz regionda davamlı sabitliyin və əməkdaşlığın tərəfdarıyıq.”

Görüşün sonunda Prezident İlham Əliyev Qazaxıstan Prezidenti Kasım-Jomart Tokayevi Azərbaycana dövlət səfərinə dəvət etdi. Bu dəvət iki ölkə arasında münasibətlərin gələcəkdə daha da dərinləşəcəyinə və strateji tərəfdaşlığın yeni səhifəsinin açılacağına işarədir.

Astana görüşü göstərdi ki, Azərbaycan və Qazaxıstan artıq təkcə ortaq tarixi və mədəni köklərlə deyil, həm də ortaq məqsədlərlə birləşən iki qardaş dövlətdir. İlham Əliyevin bəyanatı və çıxışı regionda qarşılıqlı etimada, sülhə və inkişaf perspektivlərinə yeni nəfəs gətirən əhəmiyyətli siyasi mesaj kimi yadda qaldı.

            Hökmalı Mirzəyev,

            YAP hacıqabul rayon təşkilatının sədr müavini.