21 oktyabr 2025-ci ildə Astanada Azərbaycan Respublikasının Prezidenti İlham Əliyevin iştirakı ilə keçirilən Azərbaycan-Qazaxıstan Ali Dövlətlərarası Şuranın II iclası iki qardaş ölkə arasında strateji əməkdaşlığın daha da dərinləşməsi ilə yadda qaldı. Görüş zamanı dövlət başçısının mətbuata bəyanatı və imzalanmış sənədlər gələcək əməkdaşlığın yol xəritəsini müəyyənləşdirdi.

Prezident İlham Əliyev çıxışında Azərbaycan ilə Ermənistan arasında dayanıqlı sülhün əldə olunmasının region üçün açdığı imkanları diqqətə çatdırdı. O vurğuladı ki, Cənubi Qafqazda sabitlik və təhlükəsizlik artıq real siyasi müstəviyə keçməkdədir.

Tərəflər Qarabağın bərpası və iqtisadi canlanmasında Qazaxıstanın iştirakı imkanlarını müzakirə etdi. Prezident İlham Əliyev qardaş Qazaxıstanın bu prosesə verdiyi və verəcəyi dəstəyi yüksək dəyərləndirdi.

Görüş çərçivəsində bir sıra mühüm sənədlər imzalandı. Energetika, iqtisadiyyat, nəqliyyat və humanitar mübadilələr üzrə əməkdaşlığın genişləndirilməsi haqqında razılaşmalar iki ölkə əlaqələrini daha dinamik mərhələyə daşıyır.

Bu iclas bir daha göstərdi ki, Azərbaycan və Qazaxıstan təkcə strateji tərəfdaş deyil, həm də ortaq tarixi, mədəni dəyərlərə və gələcək viziona malik iki qardaş dövlətdir. Orta Dəhliz, logistika layihələri, iqtisadi əməkdaşlıq və siyasi dialoq Xəzərin hər iki sahilində böyük perspektivlər vəd edir.

Türk dünyasının birliyi – gücümüz, sabitlik – əsas hədəfimizdir!

Aytən İmanova,

YAP fəalı, Hacıqabul rayon Heydər Əliyev Mərkəzinin direktoru.