Azərbaycanın cənub-qərb hissəsində yerləşən Qubadlı rayonu, tarixi, mədəniyyəti və təbiətinin zənginliyi ilə seçilən bölgələrimizdəndir.

25 oktyabr tarixi isə Azərbaycan xalqı üçün xüsusi rəmzi məna daşıyır. Bu gün Qubadlı şəhərinin işğaldan azad olunduğu və eyni zamanda “Qubadlı şəhəri günü” kimi qeyd olunduğu tarixdir. Bu günün qeyd olunması yalnız bir şəhərin azad edilməsini deyil, həm də xalqımızın qəhrəmanlığını, torpaqlarımıza olan bağlılığını və müstəqil dövlətimizin gücünü təcəssüm etdirir.

Qubadlı rayonunun tarixi çoxəsrlik dövrləri əhatə edir. Bölgə qədim zamanlardan Azərbaycan türklərinin məskunlaşdığı ərazilərdən biri olmuşdur.
Qubadlı toponimi tarixi mənbələrdə həm etnik, həm də coğrafi mənşəyi ilə bağlı müxtəlif izahlarla anılır. Rayonun ərazisi çoxsaylı arxeoloji abidələr, qədim yaşayış yerləri, məbədlər və qalalarla zəngindir. Bu isə Qubadlının qədim mədəniyyət və sivilizasiya ocağı olduğunu sübut edir.

1993-cü ilin avqustunda Ermənistan silahlı qüvvələri tərəfindən Qubadlı rayonu işğal edilmiş, nəticədə minlərlə sakin doğma yurdlarından didərgin düşmüşdür. Rayonun kəndləri, sosial infrastruktur obyektləri, tarixi və mədəni abidələri dağıdılmış, meşələr yandırılmışdır. Qubadlı sakinləri isə uzun illər ərzində doğma torpaqlarına qayıtmaq həsrəti ilə yaşamışlar. Lakin Azərbaycan Ordusunun 2020-ci il Vətən müharibəsində qazandığı möhtəşəm Qələbə nəticəsində bu həsrət sona çatdı. Müzəffər Ali Baş Komandan, Prezident İlham Əliyevin rəhbərliyi ilə 25 oktyabr 2020-ci ildə Qubadlı şəhəri işğaldan azad olundu. Bu hadisə xalqımızın tarixində yeni bir qürur səhifəsi açdı. Qubadlının azadlığı həm də ədalətin, sülhün və milli birliyin təntənəsi idi.
Qəhrəman Azərbaycan əsgəri bu torpaqları azad etməklə həm də şəhidlərimizin ruhunu şad etdi, xalqımızın azadlıq uğrunda mübarizəsini tarixə qızıl hərflərlə yazdı.

Prezident İlham Əliyev Qubadlı şəhərinin azad olunması ilə bağlı xalqa müraciətində bu qələbəni bütün Azərbaycan xalqına, şəhid ailələrinə və qazilərə ithaf etmişdi. Bu qələbə həm də dövlətimizin hərbi, siyasi və diplomatik qüdrətinin göstəricisi oldu. Bu gün Qubadlıda geniş bərpa və yenidənqurma işləri aparılır. İşğaldan azad edilmiş digər ərazilərimizdə olduğu kimi, burada da “Böyük Qayıdış” proqramı çərçivəsində müasir infrastruktur layihələri həyata keçirilir. Yeni yollar, körpülər, məktəblər, xəstəxanalar, sosial obyektlər və yaşayış evləri inşa olunur. Qubadlı şəhərinin baş planı hazırlanmış, müasir şəhərsalma prinsiplərinə uyğun bərpa prosesi sürətlə davam etdirilir. Artıq Qubadlıya ilk sakinlərin qayıdışı üçün zəruri şərait yaradılmışdır.
Bu, dövlətin və xalqın birgə səyləri nəticəsində mümkün olmuş böyük nailiyyətdir.  25 oktyabr tarixi bu gün həm də Qubadlı sakinlərinin birliyini, dövlətə və Prezidentə olan etimadını ifadə edən gündür.

Qubadlı şəhəri günü münasibətilə hər il respublikanın müxtəlif bölgələrində tədbirlər, sərgilər və anım mərasimləri keçirilir. Bu tədbirlər həm Qubadlının tarixini gənc nəslə tanıtmaq, həm də torpaqlarımızın azadlığı uğrunda canını fəda etmiş qəhrəmanların xatirəsini yaşatmaq məqsədi daşıyır. Qubadlı bu gün azad, müasir və yenidən dirçələn bir şəhər kimi Azərbaycanın gücünü, iradəsini və milli birliyini simvolizə edir. Qubadlı şəhəri günü təkcə bir bölgənin bayramı deyil, bütün Azərbaycanın qürur günüdür. Bu gün hər bir vətəndaş Qubadlıya baxaraq dövlətimizin qüdrətini, xalqımızın birliyini və gələcəyə olan inamını görür.

Qoy 25 oktyabr – Qubadlı Şəhəri Günü xalqımız üçün daim qürur, birlik və azadlıq simvolu olaraq yaşasın!

İsmayıl  İbrahimov,

YAP Hacıqabul rayon təşkilatının sədri.