“Qubadlıya öz sahibləri qayıdıb. Qubadlının işğaldan azad edilməsi tarixi hadisə idi. Oktyabrın 25-də Qubadlı şəhərinin azad edilməsi bizim qələbəmizi yaxınlaşdırdı.”

— Prezident, Müzəffər Ali Baş Komandan İlham Əliyev.

25 oktyabr xalqımızın yaddaşına Qubadlının işğaldan azad olunduğu möhtəşəm Zəfər günü kimi həkk olunub. Bu hadisə Vətən müharibəsində dönüş nöqtəsi yaradaraq Şuşaya gedən yolun qapısını açdı və Böyük Qələbəni daha da yaxın etdi. İşğala qədər taxılçılığı, üzümçülüyü, tütünçülüyü, bostançılıq ənənələri və heyvandarlığı ilə tanınan Qubadlı Azərbaycan kənd həyatının, zəhmətin və milli ruhun canlı təcəssümü idi. Qubadlının azad olunması xalq–ordu–Ali Baş Komandan birliyinin sarsılmaz gücünü dünyaya göstərdi, milli ruhumuzu, dövlət iradəmizi və azadlıq əzmimizi daha da möhkəmləndirdi.

Bu gün Qubadlıda aparılan bərpa və quruculuq işləri şəhərin tarixi simasını yenidən canlandırır, Zəfərin izlərini əbədi yaşadır. Prezident İlham Əliyevin 19 oktyabr 2022-ci il tarixli səfəri zamanı “Zabuxçay” və “Bərgüşadçay” su anbarlarının layihələri ilə tanışlığı, eləcə də “Azərişıq” ASC-nin 35 kV-luq yarımstansiyası və Rəqəmsal İdarəetmə Mərkəzinin təməlqoyması bölgədə yeni həyatın, işığın və böyük qayıdışın real təməlini qoydu. Qubadlı bu gün yenidən dirçəlir — yollar çəkilir, işıq yanır, su gəlir, həyat qayıdır. Üçrəngli bayrağımız qürurla dalğalanır və hər qarışı Vətən sevgisi ilə yoğrulmuş bu torpaqlar öz sahiblərini böyük inamla qarşılayır.

Qubadlı gününün mənası təkcə bir şəhərin azadlığı deyil — bu gün xalqımızın iradəsinin, birliyinin və əbədi Zəfərinin rəmzidir. Qarabağ Azərbaycandır!

         İsmayıl Salmanov,

         YAP Hacıqabul rayon təşkilatının məsləhətçisi.