AMEA-nın 80 illik yubileyində dövlət başçısı elm və innovasiyanın milli prioritetlərdəki rolunu vurğuladı.

3 noyabr 2025-ci il tarixində Azərbaycan Milli Elmlər Akademiyasının 80 illik yubileyi münasibətilə keçirilən təntənəli mərasimdə Prezident İlham Əliyev elmin ölkənin gələcək inkişafındakı strateji rolundan, alimlərin cəmiyyətə verdiyi töhfələrdən və qarşıdakı illər üçün yeni hədəflərdən danışıb.

Dövlət başçısı çıxışına alimləri təbrik etməklə başlayıb:

“Hörmətli xanımlar və cənablar, dəyərli alimlər! Sizi Akademiyanın 80 illik yubileyi münasibətilə səmimi qəlbdən təbrik edir, gələcək fəaliyyətinizdə uğurlar arzulayıram.”

Prezident vurğulayıb ki, Akademiya səkkiz onillik ərzində Azərbaycanın elmi düşüncəsinin və intellektual həyatının əsas mərkəzinə çevrilib. Onun sözlərinə görə, AMEA-nın fəaliyyəti yalnız elmi nailiyyətlərlə deyil, həm də dövlət idarəçiliyinə, təhsilə və texnoloji inkişafa təsiri ilə ölçülür:

“Bu illər ərzində Akademiya ölkəmizdə elm sahəsinin lider qüvvəsi olub. Azərbaycan alimləri həmişə elmi və ictimai həyatın önündə gediblər.”

İlham Əliyev çıxışında qeyd edib ki, müasir dövr yeni çağırışlar qarşıya qoyur və Azərbaycan elmi bu dəyişikliklərə çevik şəkildə uyğunlaşmalıdır:

“Azərbaycan tamamilə yeni bir mərhələdə yaşayır. Biz dünyada baş verən elmi və texnoloji proseslərdən geri qalmamalı, əksinə, onlara öz töhfəmizi verməliyik.”

Prezident xüsusilə süni intellekt, biotexnologiya, enerji səmərəliliyi və müdafiə sənayesi kimi istiqamətlərin prioritet olacağını bildirib:

“Süni intellekt artıq bütün ölkələrin gələcək inkişafının ayrılmaz hissəsidir. Biz bu sahədə geri qalmamalı, milli potensialımızı gücləndirməliyik.”

Dövlət başçısı həmçinin son illərdə elmin maliyyələşdirilməsinin əhəmiyyətli dərəcədə artdığını diqqətə çatdırıb:

“Son on il ərzində Azərbaycanda elmin maliyyələşdirilməsi iki dəfədən çox artmışdır. Bu, dövlətin elmə və alimlərə olan münasibətinin göstəricisidir.”

Nitqində Prezident Heydər Əliyev dövrünə də xüsusi yer ayıraraq, ötən əsrin 70-ci illərində gənclərin SSRİ-nin qabaqcıl universitetlərinə göndərilməsinin bu günün elmi kadr potensialının formalaşmasında mühüm rol oynadığını xatırladıb.

Cənab Prezident İlham Əliyev həmçinin, Azərbaycanın son illərdə qazandığı uğurlardan danışaraq bildirib ki, bu nailiyyətlərdə elmin və intellektual potensialın da payı böyükdür:

“Bir neçə gün sonra biz şanlı Qələbəmizin beş illiyini qeyd edəcəyik. Bu Qələbə yalnız hərbi sahədə deyil, həm də milli iradə və intellektin təntənəsidir.”

Çıxışının sonunda Prezident elm ictimaiyyətinə müraciətlə qeyd edib:

“Mən əminəm ki, Azərbaycan Milli Elmlər Akademiyası və alimlərimiz bundan sonra da ölkəmizin uğurlu inkişafına öz töhfələrini verəcəklər. Elm bizim gələcəyimizin təminatıdır.”

AMEA-nın yubiley tədbiri Azərbaycan elminin yeni mərhələyə qədəm qoyduğunu nümayiş etdirdi. Dövlətin elmi potensiala verdiyi önəm, alimlərin məsuliyyət hissi və texnoloji islahatlara yönələn siyasət bu sahənin qarşıdakı illərdə daha da inkişaf edəcəyinə inam yaradır.

           Hökmalı Mirzəyev

           YAP Hacıqabul rayon təşkilatının sədr müavini.