Azərbaycan Respublikasının Prezidenti İlham Əliyevin Özbəkistanın Milli İnformasiya Agentliyinə (UzA) verdiyi müsahibə iki ölkə arasında möhkəm və sarsılmaz strateji tərəfdaşlığın daha da dərinləşməsinə dair mühüm mesajlarla yadda qaldı. Müsahibə tarixi qardaşlıq əlaqələrinə, iqtisadi inteqrasiyaya və gələcəyə yönəlmiş enerji əməkdaşlığına dair kompleks baxış təqdim edir.

Prezident İlham Əliyev Özbəkistanı Azərbaycan üçün qardaş ölkə və etibarlı müttəfiq kimi xarakterizə edərək vurğuladı ki, bu münasibətlər əsrlərdən gələn mədəni, dil və mənəvi bağlara söykənir. Bu gün iki ölkə təkcə tarixi yaxınlıqla deyil, həm də siyasi iradə və sıx əməkdaşlıqla bir-birinə bağlıdır. Dövlət başçıları arasında səmimi münasibətlər bu tərəfdaşlığın daha da möhkəmlənməsində mühüm rol oynayır.

Müsahibədə iqtisadi və ticarət sahəsində əldə olunan nəticələr xüsusi qeyd olunub. Ölkələr arasında ticarət dövriyyəsinin dinamik artımı, qarşılıqlı investisiyaların genişlənməsi və sənaye layihələrinin icrası Azərbaycan–Özbəkistan münasibətlərinin praktiki nəticələrini nümayiş etdirir. Prezident İlham Əliyev iqtisadi əməkdaşlığın hazırkı səviyyəsinin tam məmnunluq doğurduğunu və bu inkişafın qarşıdakı illərdə daha da sürətlənəcəyini bildirib.

Energetika sahəsi də Prezidentin müsahibəsində əsas istiqamətlərdən biri kimi diqqətə çatdırılıb. Azərbaycanın enerji infrastrukturu və Özbəkistanın geniş sənaye potensialı bu sahədə qarşılıqlı əməkdaşlığı daha da gücləndirir. Xüsusilə yaşıl enerji, bərpa olunan mənbələr, alternativ enerji layihələri və elektrik enerjisi mübadiləsi gələcək tərəfdaşlığın prioritetlərindən biri kimi qiymətləndirilib. Azərbaycanın Qarabağ və Şərqi Zəngəzurda yaratdığı “yaşıl enerji zonası” da bu əməkdaşlıq üçün yeni imkanlar açır.

Prezident İlham Əliyevin UzA-ya müsahibəsi göstərdi ki, Azərbaycan və Özbəkistan arasındakı münasibətlər təkcə bu günün deyil, gələcəyin də strateji xəttini müəyyən edir.

            Aytən İmanova,

            YAP fəalı, Hacıqabul rayon Heydər Əliyev Mərkəzinin direktoru.