Azərbaycan Respublikasının Prezidenti cənab İlham Əliyevin fəaliyyəti müasir Azərbaycanın siyasi, iqtisadi və hərbi gücünün formalaşmasında həlledici rol oynamışdır. Onun rəhbərliyi dövründə ölkəmiz təkcə regionda deyil, beynəlxalq müstəvidə də söz sahibi olan güclü dövlətə çevrilmişdir.

Prezident İlham Əliyevin 14 fevral 2024-cü il tarixində söylədiyi fikirlər müstəqil Azərbaycan tarixində yeni bir mərhələnin rəmzi kimi yadda qalmışdır:

“Bu prezident seçkilərinin əsas əlaməti, xüsusiyyəti və önəmi ondadır ki, müstəqillik dövründə ilk dəfə idi ki, seçkilər ölkəmizin bütün ərazilərində keçirilmişdir… Orada verdiyim səs, o qutuya atdığım bülleten, sadəcə olaraq, bülleten deyildi. Bu, erməni separatçılarının tabutuna vurulan son mismar idi.”

Bu sözlər Azərbaycanın ərazi bütövlüyünün tam bərpasının və dövlət suverenliyinin qəti şəkildə təmin edilməsinin siyasi ifadəsidir.

Təhsil – uğurlu liderliyin möhkəm təməli

1961-ci il dekabrın 24-də Bakı şəhərində anadan olmuş İlham Heydər oğlu Əliyev 1967–1977-ci illərdə Bakı şəhərində 6 saylı orta məktəbdə təhsil almışdır. 1977–1982-ci illərdə Moskva Dövlət Beynəlxalq Münasibətlər İnstitutunda ali təhsil almış, 1982-ci ildə həmin institutun aspiranturasına daxil olmuşdur. 1985-ci ildə dissertasiya müdafiə edərək tarix elmləri namizədi elmi dərəcəsini qazanmışdır. Bu zəngin akademik baza onun gələcək siyasi və dövlətçilik fəaliyyətinin intellektual əsasını təşkil etmişdir.

Prezident İlham Əliyev 1985–1990-cı illərdə Moskva Dövlət Beynəlxalq Münasibətlər İnstitutunda müəllim kimi çalışmış, 1991–1994-cü illərdə özəl biznes sahəsində rəhbər vəzifələrdə fəaliyyət göstərmişdir. 1994–2003-cü illərdə Azərbaycan Respublikası Dövlət Neft Şirkətində vitse-prezident, daha sonra birinci vitse-prezident vəzifələrini icra etmişdir.

O, 1995 və 2000-ci illərdə Milli Məclisin üzvü seçilmiş, 1997-ci ildən Azərbaycan Milli Olimpiya Komitəsinin Prezidenti kimi ölkədə idmanın inkişafına mühüm töhfələr vermişdir. 1999-cu ildən Yeni Azərbaycan Partiyasında rəhbər vəzifələrdə təmsil olunmuş, 2005-ci ildə partiyanın sədri seçilmişdir. 2003-cü il avqustun 4-də isə Azərbaycan Respublikasının Baş naziri vəzifəsinə təyin olunmuşdur.

Güclü lider, güclü Azərbaycan

Cənab İlham Əliyevin siyasi iradəsi, strateji baxışı və qətiyyətli qərarları nəticəsində Azərbaycan öz ərazi bütövlüyünü bərpa etmiş, regional və qlobal miqyasda nüfuzunu əhəmiyyətli dərəcədə artırmışdır. Onun fəaliyyəti dövlətçilik ənənələrinin möhkəmləndirilməsi, milli maraqların qorunması və xalqın rifahının yüksəldilməsi ilə səciyyələnir.

Bu gün Prezident İlham Əliyev müasir, qalib və suveren Azərbaycanın lideri kimi tarixə adını qızıl hərflərlə yazdırmışdır.

            Hökmalı Mirzəyev,

            YAP Hacıqabul rayon təşkilatının sədr müavini.