Bakı şəhərinin “Dünyanın İdman Paytaxtı” seçilməsi ölkəmizin beynəlxalq idman aləmində qazandığı nüfuzun və etimadın bariz göstəricisidir. Bu titul təkcə paytaxtımız üçün deyil, bütövlükdə Azərbaycan dövləti və xalqı üçün böyük şərəf və qürur mənbəyidir. Eyni zamanda, bu qərar Azərbaycanda idmanın inkişafı istiqamətində həyata keçirilən ardıcıl və məqsədyönlü siyasətə verilən yüksək qiymət kimi dəyərləndirilməlidir.

Prezident İlham Əliyev Bakı şəhərinin “Dünyanın İdman Paytaxtı” seçilməsini Azərbaycanın idman sahəsində qazandığı nailiyyətlərə verilən yüksək beynəlxalq qiymət kimi dəyərləndirib və bu ada layiq şəkildə fəaliyyətin davam etdiriləcəyini bildirib.

Prezident İlham Əliyev mərasimdə çıxışı zamanı vurğulayıb ki, beynəlxalq yarışlarda idmançılarımız tərəfindən 2000-dən çox medal, təqribən 600-dən çox qızıl medal qazanılıb. Bu, bir daha onu göstərir ki, idmanın inkişafı Azərbaycanda uğurla gedir. Keçən illə müqayisədə medalların sayı daha çoxdur və bu, yəqin ki, təbiidir. Çünki idmanın inkişafına göstərilən diqqət, aparılan dövlət siyasəti, əlbəttə ki, ildən-ilə daha yaxşı nəticələrə gətirib çıxarır.\ Azərbaycanda idmanın inkişafı dövlət siyasətidir və dövlət xətti ilə bir çox proqramlar icra edilmişdir. Sağlam gənc nəsil, ilk növbədə, ölkənin gələcək inkişafı üçün lazımdır. Bizim siyasətimizin əsas istiqamətlərindən biri də gəncləri sağlam ruhda tərbiyə etməkdir, vətənpərvərlik ruhunda tərbiyə etməkdir ki, gənclər Vətən sevgisi ilə böyüsünlər, tərbiyə alsınlar və beləliklə, ölkəmizin inkişafı daimi olsun, əbədi olsun. İdmançılarımız Dövlət Bayrağını beynəlxalq yarışlarda qaldıranda əlbəttə ki, hər birimiz qürur hissi keçiririk. Son 5 il ərzində bizim bayrağımız qalib ölkənin bayrağı kimi beynəlxalq arenalarda qaldırılır. Əminəm ki, idmançılar da beynəlxalq yarışlarda iştirak edən zaman bunu hiss edirlər. Ölkəmizə, xalqımıza olan münasibəti hiss edirlər və idman meydançalarına, idman arenalarına çıxarkən, yəqin ki, təbii olaraq qürur hissi ilə çıxırlar. Eyni zamanda, bizim 5 il bundan əvvəl əldə etdiyimiz şanlı Qələbə idmançıların məsuliyyətini də böyük dərəcədə artırır. Çünki onlar müzəffər xalqın nümayəndələri kimi yarışlarda iştirak edirlər. Bu ilin ölkəmizdə keçirilmiş əsas idman yarışı təbii ki, MDB ölkələrinin üçüncü Oyunları olmuşdur. Bu il ölkəmizdə ilk dəfə olaraq UFC üzrə beynəlxalq turnir keçirilmişdir. Birinci Formula 1 yarışından sonra ölkəmizə gələn xarici turistlərin sayı 20 faiz artmışdır. Ölkəmizdə yüzlərlə idman, beynəlxalq idman yarışları keçirilmişdir və gələn il də yarışların keçirilməsi gözlənilir.

Əlbəttə ki, bu il daha bir önəmli hadisə baş vermişdir. Bakı şəhəri “Dünyanın İdman Paytaxtı” seçilmişdir və bu da çox böyük hadisədir, bizim üçün böyük şərəfdir.Bakının “Dünyanın İdman Paytaxtı” seçilməsi Azərbaycanın idman sahəsində əldə etdiyi uğurların beynəlxalq səviyyədə tanınmasının parlaq nümunəsidir. Bu hadisə həm qürurvericidir, həm də yeni vəzifələr müəyyən edir. Dövlətin idmana göstərdiyi davamlı dəstək, formalaşmış mükafatlandırma ənənələri və yaradılmış müasir infrastruktur Azərbaycanın idman şöhrətinin gələcəkdə də yüksələcəyinə tam əsas verir.

Şahin Mənəfov,

YAP Neftçala rayon təşkilati ərazi partiya təşkilatının sədri

Neftçala Rayon Statistika İdarəsinin rəisi